Тыва РФ-тиң камгалал сайыдының кубогунга чоннар аразының I маргылдаазын эрттиреринге белеткенип турар

Кызылда «Субедей» спорт школазынга октябрьның 7-8 хүннеринде шериг албанныглар аразынга спортчу хүреш маргылдаазы болуп эртер. Бо чылын маргылдааның кол шаңналы дээш Россияның чыынды командазындан аңгыда, Иран, Сирия, Армения, Таджикистан, Беларусь дээш, он хире даштыкы чурттарның шериглери хүрежир. «Спорт таварыштыр найырал» — маргылдааның кол кыйгырыы.

Бо чылдың эгезинден-не Тыва спортчу улуг болуушкунга белеткенип эгелээн. Февральда республиканың Баштыңы Владислав Ховалыг РФ-тиң Камгалал яамызындан кол организатор болур 41-ги армияның (ТШО) командылакчызының күш-дамыр белеткелиниң талазы-биле дузалакчызы Иван Кувырзин-биле спортчу хемчегниң организастыг айтырыгларын сайгарып чугаалашкан турган. Владислав Ховалыг спортчу хемчегниң дугайында чугаалап тура, маргылдааның статузу өскерилгени-биле регионнуң харыысалгазы бедээнин демдеглээн.

РФ-тиң камгалал яамызының кубогу дээш сөөлгү эрткен маргылдаага Россия Армиязының аңгы-аңгы кезектеринден сес команда “Мөгелер тайбың дээш” деп кыйгырыгның адаа-биле хостуг болгаш грек-рим хүрештерге күжүн шенешкен. Ынчан ЦСКА командазы тиилээн.

Бо чылгы маргылдааның программазы-биле олимпийжи чемпионнар – Джамал Отарсултанов биле Давит Чакветадзе ужуражылгалар үезинде бичии мөгелерге, спортчу хүрешке ынактарга база киржикчилерге мастер-класстарны эрттирер.