Тываның школачылары Президентиниң бүгү-российжи спортчу оюннарында шыырак он команда санынче кирген

«Президент маргылдаалары» бүгү-российжи спортчу школачылар маргылдааларының түңнел оюннарынга Тыва Республиканы Кызылдың 5 дугаар гимназиязы биле Сукпак ортумак школазының өөреникчилери төлээлээн. Элээди спортчулар 10 медальдарны чаалап алган. Тываның Баштыңы Владислав Ховалыг ниити сан-биле шаңналдыг черже киргени дээш команда кежигүннеринге байырын чедирген.

Сентябрьның 7-ден 27-ге чедир Анапа хоорайда “Смена” бүгү-российжи уруглар төвүнге эрткен школачыларның российжи маргылдааларынга бүгү чурттан шупту 85 команда киришкен.

Маргылдаалар дөрт кол хевирге болуп эрткен: спортчу хөй мергежилдиң маргылдаазы, эстафета чарыжы, теоретиктиг болгаш чогаадыкчы конкурстар.

Тыва школачылар шаңналдыг черлерни элээн: 50 килдиң деңзизинге Долгарма Саая чемпионнаан, Падма Донгак биле Пема Куулар хүлер медальдарны чаалап алган, кыстар аразынга 59 килге Айза Саая база оолдар аразынга 58 килге Начын Монгуш, 64 килге Дамба Монгуш мөңгүн медальдарны чалап алган. Оолдар аразынга Евгений Оолак (49 кг), Баир Саая (58 кг), Ильяс Захаров ( 64 кг) база кыстар ортузунга Лиана Кара-Сал (59 кг) хүлер медальдарга төлептиг болганнар.

Тываның командазы ниити сан-биле алдыгы черни ээлээн. Команданың кежигүннери Россия Федерациязының Чырыдыышкын яамызындан база Спорт яамызындан, Баштайгыларның шимчээшкининден кубокту база дипломнарны, тураскаалдыг шаңналдарны алган.

Маргылдаалардан аңгыда, янзы-бүрү өөредилге программаларын организастаан: уруглар төвү-биле таныштырып, ат-алдарлыг спортчулар-биле ужуражылгаларны, чогаадыкчы мастер-класстарны эрттирип, Төптүң музейин көргүскен.