Тываның Баштыңы Россияның чырыдыышкын сайыдының оралакчызы-биле республикада школалар тудуун чугаалашкан

Владислав Ховалыг ужуражылга үезинде, Андрей Николаев-биле республикада 11 школалар тудуун сайгарып чугаалашкан. Улуг-Хем кожууннуң Чааты сумузунда школаны көдээ девискээрлерниң комплекстиг хөгжүдер федералдыг программа боттандырылгазы-биле тудуп турар. Чырыдыышкын яамызының шугуму-биле “Өөредилге” национал төлевилелден арткан он школаның акшаландырыышкынын чорудар.

- Чыл төнчүзүнге чедир Кызылда, Сукпакта, Вавилин ээтпээнде база Балгазында, бо дөрт школа дужааттынар ужурлуг – деп, Владислав Ховалыг демдеглээн. – Өөредилге чорудуун үшкү улдуңда эгелээп деп планнаан бис. Чаа өөредилге чылында ынчалдыр үш муң ажыг өөреир олуттар ажыттынар.

А арткан дөрт объектиде ажылдар график езугаар чоруп турарын, регионнуң баштыңы демдеглээн. Тудуг ажылдарын хууда контрольдап бир эвес айтырыглар тургустунуп келзе, тудугжулар-биле кады демниг, ажыл-агыйжы байдалда шиитпирлеп турарын чугаалаан.

- Неделя санында тудугга чедип, хынап турар бис. Шынап-ла дыка улуг тудуг ажылдары чоруп турар. Россияның Чырыдыышкын яамызының төлевилелдеринге Тываның киржилгези өөредилге адырында чидиг айтырыгларны - өөредилге черлеринге сыңышпас, чамдык школаларда үшкү ээлчеглерни, кожууннарда чок чогуур инфраструктура айтырыгларын шиитпирлээр аргалыг – деп, Тываның Баштыңы демдеглээн.

Арткан чеди школаның тудуу доосту бээрге, регионга беш муң хире өөренир олуттар ажыттынарын Владислав Ховалыг айыткан. Амгы үеде школа тудугларында муң ажыг ажылчыннар, чүс ажыг техника аймаа хаара туттунган.

«Тываның демографтыг көргүзүглери эки. Өөредилге инфраструктуразын чаартыры - школалар, уруглар садтары, техникумнарны тудуп, чаарттыры – регионга эң чугула херек» – деп, Андрей Николаев демдеглээн.