Тывада ОРВИ аарыы неделяда 2,1 катап өскен

Чылдың 37-ги неделязында, Тывада ОРВИ аарыы ийи катап көдүрлүп, 51-ден 105 четкен. Чаа өөредилге чылы эгелээни-биле ОРВИ аарыы нептерээнин Роспотребнадзорнуң регионалдыг эргелели дыңнаткан. Республиканың Баштыңы Владислав Ховалыгга неделяның эпидемиологтуг байдалының дугайында илеткээн.

Ооң мурнунда чылдарда ышкаш, школалар аарыгның кол өскүүр чери болганын статистика бадыткаан. Аараан кижилерниң 80 ажыг хуузу - уруглар. ОРВИ-лээш эмнелгеге киргеннериниң 73,6 хуузу база-ла уруглар. Неделяда аараан 32 таварылганың 6-зы, азы 5,3-зы 14 харга чедир уруглар.

Регионда эпидемиологтуг сезонге чедир, 4 неделяның ПЦР-шинчилелдеринден көөрге, аараан уругларның 80 хире хуузу аденовирустан аарып турар. Ийиги черде – риновирус. Грипп, ковид болгаш өске-даа вирустар илереттинмээн.

Республикада ОРВИ-ден аараан чоруктар немешсе-даа, эпидемияга чедир ам-даа элек. Халдавырлыг инфекциялардан аарыыры эпидемиологтуг байдалга ам-даа 90,3 хуу четпес. Ындыг болзажок, сезоннуг гриппке удур чурттакчы чонну тарыырын дүргедедир херек.

Аарыгларга удур тарыышкынның федералдыг календары езугаар, 2023 чылда Тывага чурттакчы чоннуң 60 хуузун, азы 199,5 муң кижини тарыыр, ооң иштинде 92,6 муң бичии уругларны. Республикада гриппке удур Ультрикс Квадри вакцинаның бирги партиязы чедип келген. Ол Совигрипп вакцина-биле дөмей. Ол ийи вакцинаның кайызын-даа 6 айдан өрү, каш-даа харлыг кижилерге садып болур.