Тыва спортчулар Кыдатка у-шуга алдын, мөңгүн, хүлер медальдарны чаалап алган

У-шунуң бир угланыышкыны – тайцзицюаньга XI делегей чергелиг маргылдаага тыва спортчулар чедиишкинниг киржип, алды медальды чаалап алганнар.
Чөөн-Хемчиктиң муниципалдар аразының эмнелге төвүнүң фтизиатр эмчизи, у-шучу Айлан Ондар танцзигунь база танцзицюань ийи хевирге киришкеш, ийи алдын медальды чаалап алган. Судьядар ооң көргүзүүнге эң бедик демдектерни салган.
«Демография» национал төлевилел-биле “Хөй-ниитиниң кадыкшылын быжыглаары” регион программазының боттандырыкчызы, биология эртемнериниң доктору Чойган Самбыланың удуртулгазы-биле Айлан Ондар эрткен чылын белеткенип эгелээнин демдеглээлиңер.

Тренер башкының өөреникчилери болур «У-шу – узун назынче орук» клубтуң ийи кежигүннери база чедимчелиг болган. Эльвира Ооржак тай чи угланыышкынга ийи мөңгүн медальды чаалап алган болза, Оксана Ооржак мөңгүн биле хүлер медальдарга төлептиг болган.

Чойган Самбыла тергиин көргүзүглери дээш спортчуларга байырны кымны мурнай чедирген. Боттарның күжүнге бүзүрелдиин көргүзүп, чаа бедиктерни чедип алганы дээш спортчуларга байырны чедирип, шыдамык чоруу, кызымак күш-ажылы, сагылга-чуруму болгаш ушуга ынакшылы дээш четттиргенин соцчеткилер таварыштыр илереткен.

Ооң мурнунда Тывага кээп, у-шунуң мөгейикчилери-биле маңаа ажылдап турган, у-шунуң алдар-аттыг тренери Гао Цян спортчуларга маргылдаага киржир чалалганы чоруткан. Бо удаада Кыдатка эрткен маргылдаага бистиң спортчуларывыс ооң удуртулгазы-биле киришкен.

Сентябрьның 15-21 хүннеринде Кыдатта Цзяоцуо можунуң Хэнань хоорайга маргылдаалар эрткенин сагындараал. Тайцзицюаньны нептередиринче угланган маргылдаа КУР спортчу туризм программазында кирген болгаш, ийи чылда бир катап эртип турар. Ол адырда шыырак дээн специалистерни аңаа киржир кылдыр чалап турар. Тайцзицюаньның философиязы аарыглардан адырлып, сагыш-сеткил оожургалын алырынче угланган.