Тывага Армейжи культура хүннери чогаадыкчы коллективтерниң гала-концерти-биле доозулган

Дүүн Кызылга,. В. Көк-оол аттыг Национал хөгжүм-шии театрынга Тыва Республикада Армейжи культура хүннериниң байырлыг хаашкынын кижи бүрүзү дорт дамчыдылгадан көөр аргалыг болган.

Тываның Чазааның деткимчези-биле Россия Федерациязының Камгалал яамызының Культура департаментизи база Тыва Республиканың Культура яамызы армейжи культураны нептередип, ада-чурттуң төөгүзүнге аныяктарның хүндүткелин хевирлеп, чоннуң хамааты-патриотчу болгаш сагыш-сеткил-мөзү-бүдүш кижизидилгезинче угланган культура-өөредиглиг хемчеглерниң төнчү кезээ болган концертти көргүскен.
Армейжи культура хүннери бүгү республикага чугула ужур-уткалыг болуушкун болганын регионнуң Баштыңы Владислав Ховалыг демдеглээн. Россияның Камгалал яамызының Культура департаментизи улуг болгаш чымыштыг ажылды чоруткан: «600 ажыг кижи программага киришкен. Төрээн чуртка ынакшыл, ада-чурттуң төөгүзүнге хүндүткел, Ада-чуртун камнап база камгалаар күзел дээн ышкаш кижилерге эң-не үнелиг мөзү-бүдүш билиглерин мастер-класстар, беседалар, чогаадыкчы ужуражылгалар, делгелгелер база концерттер бир тускай, чараш кылдыр угааткан. Чуртунга, ооң дайынчы өнчү салгалынга чоргаарланып чоруур патриоттар кылдыр өзеринге бистиң уруг-дарыывыска бүзүрелди бээр» - деп, республиканың удуртукчузу демдеглээн.

Тываның Баштыңы республикага Армейжи культура хүннерин эрттиргени дээш, Камгалал яамызының Культура департаментизиниң директору Артем Владимирович Горныйга база департаментиниң килдис начальниги Ольга Владимировна Фаллерге өөрүп четтиргенин илереткен. Артем Владимирович Горныйга «Тыва Республиканың уран чүүлүнүң алдарлыг ажылдакчызы» хүндүлүг атты тывыскан.

Республика Камгалал яамызының авыралы-биле, ТШО зоназынга база чаа регионнарга тыва артистерниң концертин организастаар деп планнап турарын Владислав Ховалыг дыңнаткан.

«Армейжи культура хүннери» - российжи армияның төөгүзүнге болгаш культуразынга сонуургалды күштелдирерин деткээн Россияның улуг ужур-уткалыг шериг культура төлевилелдериниң бирээзи болур. РФ-тиң Камгалал яамызының инициативазы-биле ол 2013 чылдан бээр эртип турар. Неделя дургузунда Тываның өөредилге организацияларының база культура албан черлериниң баазазынга Армейжи культура хүннериниң хөй санныг культура-массалыг хемчеглери болуп эрткен.

Россия Федерациязының Камгалал яамызының Культура департаментизиниң директору Артем Горныйга удурткан ооң ажылдакчылары, шериг культура албан черлериниң ажылдакчылары, чогаадыкчы коллективтер кирген улуг десант Армейжи культура хүннерин эрттирери-биле республикага келген.

Регионалдыг база армейжи чогаадыкчы коллективтерниң гала-концерти армейжи неделяны хагган. Агаар-десант шериглериниң ыры болгаш пляска ансамблиниң, стратегтиг угланыышкынныг ракета шериглериниң «Красная звезда» ансамблиниң база Чөөн чүк шериг округунуң ыры болгаш пляска ансамблиниң артистери чогаадыкчы оюн-көргүзүүн бараалгаткан.