Тывада уругларның аъш-чемден калбаа-биле хораннанганындан, школаларже изиг чем хандырыкчыларның шуптузун хынап эгелээн

Кызылдың 18 дугаар школазында массалыг хораннаныышкын болганы бүрүткеттинген, болуушкуннуң чылдагааны тодараттынгыже, чемненилге черин хагганын, Тываның Өөредилге яамызы дыңнаткан.
«Амгы үеде школаның чемненир черин хаггаш, таңмалаан – деп, ведомство дыңнаткан. – Хыналда-хайгаарал органнары чем аймаан хынаары-биле алган, а ажылчыннарын анализтер дужаар кылдыр чоруткан».
Росхереглелхайгараалының Тыва Республикада эргелели регионнуң Өөредилге яамызы-биле кады Кызыл хоорайның 18 дугаар школазының администрациязындан санитар-эпидемиологтуг болгаш өске-даа негелделерни сагып турарынга хыналдаларны эгелээн. Ооң түңнели-биле чогуур шиитпир хүлээп алдынар.
Бо хонуктарда Владивостокта Чөөн чүк экономиктиг форумунда ажылдап турар Тываның Баштыңы Владислав Ховалыг өөредилге черлерин изиг чем-биле хандырып турар шупту хандырыкчыларны хынаар ажылды организастаар даалганы вице-премьер Орлан Сарыгларга берген. «Кызылда 18 дугаар школада аъш-чемге уруглар хораннанган дугайында медээни дарый алдым» - деп, Тываның Баштыңы демдеглээн.
18 дугаар школазының 11 классчылары Кызылдың эмнелге албан черлеринче ишти аарааш киргенин, ТР-ниң Кадык камгалал яамызы дыңнаткан. Уругларга бирги эмчи дузазын көргүзүп, анализтерин алган. Дүүн оларның саны 45 кижи четкен: 42 бичии уруг, школа ажылчыны база ада-иелер бар. Республиканың халдавырлыг аарыглар эмнелгезинче «ижин аарыы, гастроэнтерит» деп диагнозтуг беш уруг база бир улуг кижи кирген. Оларның үжүнүң байдалы ортумак, бир кижиниң – берге. Артканнарны амбулаторлуг эмнедир кылдыр чандырган, педиатр болгаш инфекционист эмчилер оларның байдалын хайгааралда алган.
Дуза дилеп келген кижилер кустуруп, ишти аарып, шаа чогун дыңнаткан. Оларга чогуур эмнээшкиннерни томуйлаан. Эм аймаа четчир деп, Кадык кмаглал яамызы дыңнаткан.
Шупту анализтерниң лабораторлуг түңнелдерин алган соонда, чүден хораннанганы билдинер.