Тываның Баштыңы Владислав Ховалыг соңгулдаларга тиилээн губернатор коллегаларынга байырны чедирген

Алтай крайда Виктор Томенконуң, Кемерово облазында Сергей Цивилёвтуң, Красноярск крайда Михаил Котюковтуң, Москвада база Москва облазында Сергей Собянин биле Андрей Воробьёвтуң, Нижегород облазында Глеб Никитинниң, Новосибирск облазында Андрей Травниковтуң, Омск облазында Виталий Хоценконуң, Смоленск облазында Василий Анохинниң, Чукотка Автономнуг округта Владислав Кузнецовтуң база Якутияда Айсен Николаевтиң адынче байыр чедириишкинниг телеграммалар Тыва Республикадан чоруткан.
Владислав Ховалыг соңгулдаларга тиилелгези дээш коллегаларынга сеткилиниң ханызындан байыр чедиргеш, чоннуң хүндүткелин болгаш бүзүрелин чаалап алган эртем-билии, арга-дуржулгазы база башкарыкчы тергиин шынарлары удуртканы регионнарының моон-даа соңгаар социал-экономиктиг хөгжүлдезинге ажыктыг болурун телеграммада бижээн. «Силерниң үре-түңнелдерже угланган тура-сорууңар регионуңарның база күчүлүг Россияның чечектелиишкини дээш чаагай өскерлиишкиннерге база чаа-чаа чаартылгаларга үндезин апаар!» - деп, Тываның Баштыңы коллегаларынга бижээн.
Улуг-хүнде кежээ, Россияда чаңгыс аай бадылаашкын хүнү болуп эрткенин сагындыраал. 86 регионга аңгы-аңгы деңнелдиң соңгулдалары болган. Баш бурунгаар түңнелдер регионнарның амгы үеде удуртукчуларынга хамаарыштыр соңгукчулар бедик бүзүрелди илереткенин көргүскен – чаа хуусаада “Чаңгыс демниг Россия” база КПРФ-тен амгы губеранторлар шупту катап соңгутканы билдинген. Президент Владимир Путинның бо чазын түр када томуйлаан удуртукчалары шупту тиилелгени чедип алган.