Тываның эрге-чагыргазы дачалар ниитилежилгезиниң чырык четкизин чаартырынга дузалажыр
04.09.2023
Тывада дачалар суурунуң идегелдиг болгаш айыыл чок чырык хандырылгазының айтырыы шиитпирлеттинген – ол ажылдарны регион бюджединден акшаландырар. Бо неделяда республиканың Чазаа коммерциялыг эвес садчылар ниитилежилгезиниң чырык четки ажыл-агыйында септелге-тудуг ажылдарын эде чаартыр база кылыр юридиктиг черлерге субсидиялар бээриниң чурумун бадылаан.
Субсидия алыкчызын шилиирде, ачы-дузазының чүгле өртээн санаан саналдарын эвес, а подрядчиктиң чогуур негелделерге дүгжүп турарын көөрүн документиде айыткан. Субсидия алыкчызы дачаның чырык четкизин бодунуң өнчүзүнче ап, ону улаштыр хандырары – кол негелдениң бирээзи.
Дачаның чырык четкизиниң айыыл чок чоруун хандырар айтырыг шагда-ла көдүрүлген. Садчылар суурунуң чурттакчылары чырыктың бо-ла өже бээрин чылдан чылче хомудап келген. Үрелик чырык удазыннары бо-ла өрт айыылын тургузуп турган. Кижилер дачалар ниитилежилгезинде чүгле чайын эвес, а бүдүн чылда чурттап турар улуг микрорайоннар апарганындан, чырык четки ажыл-агыйының чүъгү каш катап улгаткан. Солагай талакы дачаларның чурттакчы чонунуң саны 14 муң чеде берген.
Республика Баштыңы Владислав Ховалыг Тываның Одалга болгаш энергетика яамызынга дачалар суурун чырык-биле таптыг хандырарының аргаларын тып, четки объектилерин дээштиг ажаап-карактаар айтырыгны шиитпирлээр даалганы берген. Өске регионнарның практиказындан көөрге, дачажылар боттары четкизин септеп алыр болза, Тываның эрге-чагыргазы республика бюджединден акшаландырып, чырык четкизин хандыржыр арганы шилип алган. Чырык хандырылгазының чидиг айтырыын ынчаар дүрген болгаш шынарлыг шиитпирлеп болур.
Возврат к списку
|