Тываның Баштыңы дорт дамчыдылга үезинде республика чурттакчыларының айтырыгларынга харыылаар

Тываның чурттакчылары боттарының сонуургаан айтырыгларын республика Баштыңының бодунга салып болур. Владислав Ховалыг социал четкилерге дамчыдылга үезинде чаңгыс чер чурттуглары-биле дорт харылзажыр. Сентябрь 6-да, тус чернии-биле 17.00 шакта, «ВКонтакте», «Одноклассники» социал четкилерге база «Телеграмга» дамчыдылга эгелээр.
Тыва Республиканың Баштыңының болгаш Чазааның албан езузунуң арыннарында дорт дамчыдылганы дыңнаткан бижимел адаанга, регионнуң удуртукчузунга айтырыгларны ам дораан-даа салып болур силер.
Ол ышкаш Тыва Республиканың регион удуртулга төвүнүң ажылдап кылганы дараазында тускай чат-боттарны ажыглап болур:
телеграм - @glavatuva_bot,
вайбер - https://qptr.ru/Rn8F.
Оон аңгыда Күрүне ачы-дузаларының удур харылзаа шөлү https://pos.gosuslugi.ru/lkp/direct-line/1153/ таварыштыр айтырыгны салып болур.
Тыва Республиканың регион удуртулга төвүнүң специалистери дорт дамчыдылга төнгүжеге шупту айтырыгларны чыып, аайлаар.
Владислав Ховалыг республиканың чурттакчы чону-биле сөөлгү дорт дамчыдылганы 2022 чылдың ноябрь 22-де эрттиргенин сагындыраал. Ынчан аңгы-аңгы каналдар таварыштыр 600 хире айтырыг губернаторга келген. Тус черниң интернет шөлүнде изиг-изиг сайгарып турар эң чидиг айтырыглар көдүрүлген. Тываның Баштыңы чаңгыс чер чурттуглары-биле бүдүн чартык шак дургузунда чугаалашкан.