Тываның Баштыңы агаар-бойдустуң аайы-биле “онза” чурумну киирген

Август 27-ден удуртулга органнарынга база онза байдалдарже хөделир күштерге "кезээде белен болурунуң" чуруму чарлаттынган. Республиканың Баштыңы Владислав Ховалыг чогуур айтыышкынга атты салган. Агаар-бойдустуң таарымча чок байдалы-биле чурумну киирген.
Метеорологтар августуң 27-ден 31-ге чедир нормадан 7 градус улуг, аажок изиг хүннер болурун дыңнаткан. Дүүн Тываның найысылалы Кызылга, хөлегелиг черде агаарның изии 39 градус кылдыр көргүскен.
Оон аңгыда, 29-туң хүнүнде республикага суггур чаъстап, кызаңнаашкыннап, долу дүжүп, секундада 25 метрден күштүг хадып, дүнеки база эртенги шактарда туманнаар чадавас. Мөңгүн-Тайга, Улуг-Хем, Кызыл база Эрзин кожууннарга август 31-ге чедир тунааргай изиг хүннер болуру-биле, өрт айыылынга удур дүрүмнерни сагыырын ОБЯ сагындырган.
Кожуун чагыргалары, хамааты камгалал болгаш онза байдалдар албанының кзектери ол хүннерде оперативтиг байдалдарның дугайында медээлерни чыып, сайгарып белеткээш, ОБЯ девискээр системазының удуртулга органнарынче дамчыдарын организастаар. Агаар-бойдустуң дугайында медээлерни соталыг харылзаа таварыштыр чурттакчы чонга дыңнадыр.