Тывадан Ада-чурттуң улуг дайынының киржикчизи Наталья Маслова 100 харлаан юбилейнин демдеглээн

Ада-чурттуң улуг дайынының киржикчизи Наталья Ивановна Маслова 100 харлаан юбилейнин демдеглеп эрттирген. Тываның Баштыңы Владислав Ховалыг бодунуң блогунга чүс харлаан хоочунга байырын чедирип, энениң салым-чолу болгаш амыдырал-чуртталгазы – Төрээн чуртунга ынакшылдың, эрес-дидим болгаш маадырлыг чоруктуң үлегер-чижээ-дир деп демдеглээн.
Ол чылдарның хоочуннарының эрткен оруу Ада-чурттуң камгалалынга база ооң чечктелиишкини дээш тургузукчу күш-ажылче тура-сорукту аныяк-өскенге берип турар деп, бодунуң арынында бижээн.
Наталья Ивановна Ульяновск облазынга төрүттүнген. Телеграфчы-харылзаачыга өөренген, Ада-чурттуң улуг дайынының чылдарында Белоруссияның база Украинаның фронтуларынга ажыл-албанын эрттирген. 1945 чылда Японияның фронтузунче шилчээн. Наталья Ивановнаның ачы-хавыяазын хөй санныг медальдар-биле демдеглээн, оларның аразында «Германияны тиилээни дээш», «Дайынчы ачы-хавыяазы дээш» деп үнелиг медальдар бар. Ол 1959 чылда Тывага көжүп келгеш, аңгы-аңгы организацияларга повар, санитарка, ажылчын бооп ажылдаан. Ийи ажы-төлүн кижизидип өстүрген.
"Эргим, Наталья Ивановна, юбилейлиг төрүттүнген хүнүңер-биле сеткилимниң ханызындан эң-не чылыг байыр чедириишкинин хүлээп ап көрүңер. Быжыг кадыкшылды, омак-сергекти, төрээн болгаш чоок кижилериңериниң деткимчезин болгаш чылыг чымчак сагыш човаашкынын күзедим!" – деп, Владислав Ховалыг 100 харлаан юбилярга байырын чедирген.