10 чыл болган юбилейи-биле

Тываның күрүне университединиң юридиктиг факультединиң тургустунганындан бээр 10 чыл болганынга тураскааткан байырлыг хурал ол өөредилге чериниң хуралдаар залынга болган.ЮФ-туң юбилейи-биле холбаштыр ооң башкыларынга болгаш ажылдакчыларынга, студентилеринге болгаш аспирантыларынга байыр чедирери-биле ТР-ниң Чазааның Даргазының оралакчызы Анатолий Дамба-Хуурак, Дээди Хуралдың (парламентизиниң) Даргазының оралакчызы Ольга Кольчикова, ТР-ниң прокурору Александр Гринев, Россияның Юстиция яамызының ТР талазы-биле эргелелиниң, Тываның юристер ассоциациязының болгаш өске-даа черлерниң төлээлери келгеннер.

     Байырлыг хуралды ТывКУ-нуң ректору Сергей Ондар ажыткаш, юридиктиг факультет эң аныяк-даа болза, турум сайзырап турар салбырларның бирээзи дээрзин демдеглээн. 10 чыл дургузунда хөй ажылды кылган, аспиратураны ажыткан, бо чылын чаа — «Каайлы херээ» деп угланыышкынны база тургускан. Ол дээрге Тывада бир дугаар юридиктиг эртемнерниң доктору, декан Николай Алдын-оолович Ондарның ачы-хавыяазы дээрзин ректор демдеглээн.

     Николай Ондар деткимче дээш аалчыларга болгаш университеттиң удуртулгазынга өөрүп четтиргенин илереткен болгаш факультеттиң тургустунган төөгүзү-биле таныштырган.