Кызыл кожууннуӊ Каа-Хем суурда оруктарны национал төлевилелдиң ачызында экижиткен

«Айыыл чок шынарлыг оруктар» национал төлевилелди боттандырары-биле Кызыл кожууннуӊ Каа-Хем суурнуӊ Горная, Геофизическая, Безымянная, Аныяк деп кудумчуларында автооруктарны септээн.

Ол кудумчуларда хөй-ниити транспорту халдып турар. Чазаглыг оруктарга маршруттуг такси азы автобус-биле аргыжары таарымчалыг эвес дээрзин чурттакчы чон үргүлчү хомудап чугаалап турган.

Республиканыӊ национал төлевилелде киржип турарыныӊ ачызында 29 километр орук объектилерин чаартып кылыр. Каа-Хем суурнуӊ оруктарын база ол даӊзы ёзугаар асфальтылаан.

«Орук-тудуг-транспорт» ниитилели – хүлээнип алган организация орук ажылдарын төлевилелде бадылаанынга болгаш графигинге дүүштүр кылгаш, чогуур хуусаазында кылып дооскан. Оруктарны асфальтылаан, хөй-ниити транспортунуӊ орук кыдыынга доктаар «кармактарны» кылган. Ынчангаш маршруттуг такси азы хуу транспорт-биле-даа аргыжар пассажирлерге эптиг, таарымчалыг болур дээрзин кожууннуӊ чагыргазы дыӊнаткан.

Национал төлевилел-биле тудуп кылып турар орук объектилеринде шупту ажылдар график ёзугаар чоруп турар, чамдык орук участоктарында ажыл адакталган, удавас доостур дээрзин Орук-транспорт яамызы демдеглээн.

Барыын-Хемчик кожууннуӊ Улуг-Аяңгаты хемниӊ көвүүрүнүӊ тудуу сөөлгү чадазында келген. Хандагайты — Мугур-Аксы автомобиль оруунда Барлык хемни кежер көвүрүгнү септеп кылып турар. Бо объектини план ёзугаар октябрь айда дужаар.

Бо чылын көвүрүглерден аӊгыда, регионалдыг оруктарныӊ дөрт участогун болгаш Кызыл чоогунда үш орукту нормага дүүштүр кылыр.