Тываныӊ тудугжулары ЛУР-нуӊ школаларын катап тургузарынга дузалажып турар

Тыва Республика биле Луганск Улус Республиказы аразында шефтеп дузалажыр дугайында дугуржулга езугаар Луганск Улус Республиказында өөредилге албан черлерин катап тургузарынга, септеп кылырынга Тываныӊ тудугжулары дузалажып турар. Тывадан тудугжулар бригадазы Свердловск хоорайныӊ 6 дугаарлыг ортумак школазын катап тургузарынга дузалажып турар. Ооӊ соонда план ёзугаар Червонопартизанск хоорайда база бир школаны болгаш уруглар садын септээрлер.

Тываныӊ Баштыӊы Владислав Ховалыгныӊ чаа регионга эрткен чылын барып чораан үезинде ийи республиканыӊ аразында ажыл-агыйжы харылзаалар эгелээн. ЛУР-нуӊ Чазааныӊ даргазыныӊ бирги оралакчызы Владислав Кузнецов-биле ужуражып, ажыл-агый талазы-биле кады ажылдап болгу дег улганыышкыннарны ынчан чугаалашкан.

Россияныӊ чаа регионнарыныӊ, тодаргайлаарга, Луганск биле Донецк Улус Республикаларныӊ, Запорожье биле Херсон областарныӊ хоорай-суурларында инфраструктура объектилерин катап тудуп кылырынга чурттуӊ шупту субъектилери киржип турар. А Тыва Республика Свердловск хоорай биле Свердловск районнуӊ социал албан черлерин катап тудуп кылырынга дузалаар болган.

Республиканыӊ Баштыӊы бо чылдыӊ майда Свердловск хоорайга барып четкеш, хоорай чагыргазыныӊ Баштыӊы Андрей Сухачев-биле ужуражып чугаалашкан. Тываныӊ Баштыӊы неонацистерниӊ адып-болаашкыныныӊ үезинде, буступ үрелген социал албан черлерин катап септеп кылырынга шыдаар шаа-биле дузалажырынга белен дээрзин дамчыткан.

Владислав Ховалыгныӊ даалгазы-биле Свердловск хоорайга Чазак Даргазыныӊ оралакчызы Александр Брокертке баштаткан ажылчын бөлүк барып четкеш, чаартып кылыр школаныӊ оран-савазын шинчилеп көрүп алган. Ачы-дуза чедирип, школаны септеп кылыр ажылдыӊ материалдарын, чарыгдалын санааш, чугула документизин ажылдап кылган.

Тыва Республиканыӊ Чазаа база катап тургузар ужурлуг объектилерниӊ даӊзызын Луганск Улус Республиказыныӊ тудуг болгаш чуртталга-коммунал ажыл-агыйыныӊ яамызы, ЛУР-нуӊ Свердловск хоорайныӊ болгаш Свердловск районнуӊ чагыргалары-биле кады бадылаан.

Запорожье-Хингангыныӊ кызыл туктуг 203-кү адыгжы дивизиязыныӊ маадырлары аттыг Свердловскыныӊ 6 дугаарлыг ортумак школазыныӊ спорт залын Тываныӊ тудугжу бригадазы септеп турар. 600 өөреникчилиг школаныӊ спорт залы шагда-ла эргижирей берген, аварийлиг байдалда. Ынчангаш күш-культура кичээлин уруглар клазынга азы коридорунга, чылыг үеде даштыгаа эрттирип турган.

Шефтежип, дузалажып келген регионнуӊ ачызында спортзалды чаартып кылып бээр дээрзинге Свердловск хоорайныӊ чагыргазы бүзүреп турар.

Амгы үеде республиканыӊ тудугжу специалистери ында командировкалап чеде берген. Спорт залдыӊ дериг-херекселдерин, чырык системазын, электрилиг проводтарын, соӊгаларныӊ көзенээн адыргаш, дозулуг ханаларын хооруп аштаан. Крышазыныӊ ыяштарын адырып каапкан дээрзин Тываныӊ Тудуг яамызы тодаргай медеглээн.