Тывада сибирь язвазының байдалы

Тывада сибирь язвазы-биле аараанынга каразааш, эмнелгеге чыттырган 6 кижиниң бирээзиниң анализи бадыткаттынмаан дээрзин республиканың Кадык камгалал яамызы дыңнаткан.
“Оон аңгыда, Барыын-Хемчиктиң кожууннар аразының медицина төвүнче ук аарыгдан аараанынга каразыткан база бир кижи келген. Анализтерин алган. Ол ам эмчи хайгааралында” – деп, яамының парлалга албаны дыңнаткан.

Сибирь язвазы тывылган черниң чурттак­чыларын эмчилер ам-даа хайгаарап турар. Ол ышкаш өске кожууннарның төп эмнелгелеринден болгаш ко­жуун­нар аразының медицина төптеринден дүрген дуза бөлүктери база ажылын уламчылап турар. Эм-таң аймаа четчир дээрзин яамының парлалга албаны дыңнаткан.
Тываның кадык камгалал сайыды Анатолий Югай эмнелгеде чыдар 6 кижиниң 4-ү сибирь язвазындан аарааны бадыткаттына бергенин дыңнаткан. Артканнарын ам-даа хынап турар.

Сибирь язвазы кижиден кижиже чыпшынмас аарыг дээрзин Росхереглелхайгаарал албаны дыңнадып турар.
Июнь 30-де Тываның бир чурттакчызынга сибирь язвазы илереттинген турганын сагындырып каалы. Июнь 29-туң хүнүнде кадыының баксырай бергени-биле эмчиге келген. Ооң мурнунда, июнь 23-түң хүнүнде, ол кижи Бижиктиг-Хая суурга малчын аалга аът соп турганы билдинген.