Туттурган тыва шеригни солчур даӊзыже киирген
06.07.2023
Тывадан бир шеригни украиннер тудуп алган деп социал четкилерге, мессенджерлерге тарай берген медээге хамаарыштыр тускай хыналданы Республиканыӊ Баштыӊыныӊ тускай шериг операциязыныӊ айтырыгларыныӊ талазы-биле төлээзи Тимур Куулар дарый чоргускан.
Ол ылап шын медээлерни билип алыры-биле база дээштиг хемчеглерни хүлээп алыр дээш, Камгалал яамызыныӊ төлээлери-биле доп-дораан харылзажып чугаалашкан.
Сайын Иргит деп тыва солдат, шынап-ла, июнь 25-тен тура украиннерге туттурган шериглер аразында деп санадып турары билдинген.
Бистиӊ дайынчывыстыӊ ат-сывын туттурган шериглер солчур даӊзыже киирген дээрзин Тимур Куулар, шериг ведомствозу-биле чугаалашкан соонда, дыӊнаткан. Ону эгидериниӊ талазы-биле айтырыгны РФ-тиӊ Чепсектиг күштериниӊ Кол шериг-политиктиг эргелели киченгээйге алган.
Россия биле Украина туттурган шериглерин өйлеп-өйлеп солчуп турар. Шак ындыг чугула, нарын болгаш шудургу ажылды Камгалал яамызы, Даштыкы херектер яамызы, Федералдыг кижиниӊ эрге-ажыктарыныӊ талазы-биле төлээзи, Кызыл Крест делегей комитеди болгаш бөлүк структуралар кылып чорудуп турар.
Бистиӊ шериглеривисти эгидер дээш канчаар-даа аажок күженип ажылдап турар, ооӊ үре-түӊнели көстүп турар: он-он, чүс-чүс туттурган российжи шериглерни Киевтиӊ чурумунуӊ хайгаарап турар девискээринден өйлеп-өйлеп катап эгидип турар. Оларныӊ шуптузун эмнелге албан черинче чорудуп турар, аӊаа баргаш, олар чогуур эмнээшкинни, психологтуӊ ачы-дузазын ап турарлар.
Шериг албан-чери тыва шеригни катап эгидери-биле ажылдап эгелей берген болганда, ооӊ төрелдериниӊ Москваже баары чугула эвес дээрзин Тимур Куулар демдеглээн.
Возврат к списку
|