Тываның Барыын-Хемчик кожуун биле Ак-Довурак хоорайда сибирь язвазындан карантинни чарлаан

Барыын-Хемчик кожууннуң чурттакчызының сибирь язвазындан аарааны билдинип, бадыткаттынганы-биле, ук кожууннуң база Ак-Довурак хоорайның девискээринге, июньнуң 30-ден эгелеп онза айтыышкын үнгүжеге карантинни киирер деп, Тыва Республиканың Чазааның онза байдалдар комиссиязының кежигүннери шиитпирлээр.

Карантин хемчеглерниң негелделери езугаар, июньнуң 30-ден эгелеп айыттынган муниципалдыг девискээрлерге, карантинниг зона иштинге база оон дашкаар “дыштаныр хүн” ярмаркаларын эрттирерин, мал-маган аай-дедир сүрерин, бөлерин, согарын болгаш ооң продуктузун ажыглаарын, эът болгаш эъттен кылыглар садарын, сибирь язвазынга удур тарытпаан мал-маган киирип азы үндүрерин хораан.

Июнь 26-да Даг-Арты деп черде малчын аалга аът соккаш, Бижиктиг-Хая суурнуң 24 харлыг чурттакчызы сибирь язвазы деп онза айыылдыг аарыгдан аараан. Амгы үеде аныяк кижини республиканың халдавырлыг аарыглар эмнелгезинде чыттырган, чогуур эмчи дузазын чедирип турар. Тываның Кадык камгалал яамызы аарыг кижиниң байдалы берге деп дыңнаткан.

Амгы үеде аарыгның тывылган черинде санитар-эпидемиологтуг болгаш эпизоотияга удур хемчеглерни чорудуп турар. Барыын-Хемчик кожуун чагыргазының удуртулгазында оперативтиг штаб тургустунган. Тыва Республиканың Көдээ ажыл-агый яамызының удуртулгазы-биле Тыва Республиканың Ветеринария албанының эпизоотияга удур отряды аарыгның тывылган черинде мал-маганны шинчип, тарып, оперативтиг ажылды чоруткан. Аарыг кижи-биле чугаалажып, аарыг малдың эъдин ажыглап турган кижилерни тодарадып турар.

Айыттынган девискээрлерниң чурттакчылары карантин негелделерин хажыт чокка күүседир ужурлуг. Оон аңгыда сибирь язвазындан аараанынга дөмей бичии-ле ындыг чүүлдер бар болза, эмчилерни дарый кыйгыртыр. Халдавыр бар продуктуну ажыглаан соонда 1-5 хонук дургузунда, кижиниң бажы аарып, дээскинип, шыырныгып, эъдиниң изии 38-39 чеде бээр. Удатпаанда ишти аартып, ханныг азы өт-сарыг кылдыр кустуруп, хан куду олуртур.