Тывада керээ чарган шериг албанныгларга немелде акшаны төлээр

Республиканың Чазаа керээлиг шериг албанынче кирген кижилерге немелде төлевирлер дугайында доктаалды хүлээп алган.

1 чыл хуусаалыг керээни чаргаш, Россияның Чепсектиг Күштериниң шериг кезектеринче прапорщик, сержант база солдат эрге-дужаалдыг чоруткан Тыва Республиканың шериг албанныглары төлевирни алыр. 2023 чылдың май 1 соонда керээ чарган шериг албанныглар деткимчениң ол хемчээнче кордап болур. Акша-хөреңгини Тыва Республиканың Чазааның курлавыр фондузундан үндүрер.

Чаңгыс удааның төлевир акшазының хемчээли - 100 муң рубль. Шериг албанныг кижи керээни чарып алгаш, төлевирни алыры-биле республиканың Күш-ажыл болгаш социал политика яамызынче билдириишкинни киирер. Билдириишкинден өске документилер киирери көрдүнмээн. Шериг албанныгларны шилиир регионалдыг пункт-биле медээлерни шүүштүрген соонда, төлевирни ооң адынче шилчидер. Билдириишкин киирген хүнден эгелеп 10-15 хонук дургузунда, чамдык таварылгаларда 30 хонуктуң дургузунда төлевир акшазы шилчип кээр.

Бо чылдың май 31-ге чедир керээ чарган база билдириишкин киирген шериг албанныгларга чаңгыс удааның төлевирин шилчидип берген. Бо чылдың июньда кирген билдириишкиннерниң документилерин белеткеп турар, шериг албанныг кижиниң агар санынче акша бо хүннерде кирип кээр.