Тывада өртке удур онза чурумну июль 12-ге чедир узаткан

Республиканың эрге-чагыргазы арга-арыгларда тургустунган өрт айыылының нарын байдалын көргеш, өртке удур онза чурумну июль 12-ге чедир узадыр шиитпирни үндүрген. Ол үеге чедир арга-арыг киреринге, ажык черге от салырынга, ол ышкаш кургаг сиген болгаш бок өрттедиринге ооң мурнунда киирген кызыгаарлаашкын күштүг бооп арткан. Республиканың арга-арыында киирген “онза байдал” чурумун база узаткан.

Тываның Арга-арыг ажыл-агый яамызының дилээни-биле, бөгүн Иркутск облазындан чаъс чагдырар самолет-чаштырыкчы Федералдыг арга-арыг ажыл-агый агентилелиниң айтыышкыны езугаар ужуп келген.

Регионалдыг арга-арыг ажыл-агый яамызының медеглээни болза, июнь 22-де республиканың арга-арыгларында 16 өрт хып турар: Кызыл, Каа-Хем, Тожу, Таңды, Улуг-Хем база Бии-Хем кожууннарда тайгалар өрттенген. Тожу кожуунда «Азас» заповедниктиң участоктары элээн каш хонукта өрттенип турар.

Өрттерни өжүреринче авиа-өрт албанының, арга-арыг өрт станцияларының, өрт кезектериниң арга-арыг камгалалының, парашютчу-десант өрт албанының 289 ажылдакчылары хаара туттунган. Тываның Арга-арыг ажыл-агый яамызының курлавырында ам-даа 89 кижи база 103 санныг техника бар.

Бөгүн чаъс чагдырар самолет Тожу, Каа-Хем, Таңды база Кызыл кожууннарның тайгаларында өрттенип турар участоктар кырынга ажылдаан. Чаъс чагдырар дээш пирооктар-биле булуттарже атканының түңнелин амдыызында шинчилеп турарын, Тываның арга-арыг камгалал чери дыңнаткан.

Күрүнениң арга-арыг инспекторлары өрт айыылының сезону эгелээнден бээр өрт айыылынга удур чурумнуң негелделерин үрээни дээш 15 административтиг херектерни оттурган.

Иштики херектер органнарынче, Россияның ОБЯ ТР-де Кол эргелелиниң хайгаарал болгаш профилактика ажылдарының эргелелинче арга-арыг өрттеринге буруулуг кижилерни илередир дугайында 55 билдириишкин кирген.

Тывага бо чылын өрт айыылы эгелээнден бээр, эрткен 2022 чылга деңнээрге ийи катап хөй, 57 өрт бүрүткеттинген.