Тывада "Вагнер" ХШК мөчээн дайынчыларның төрээн улузунга регионалдыг төлевирлерни төлеп эгелээн

Тываның Күш-ажыл болгаш социал политика яамызы, «Вагнер» хуу шериг компаниязының мөчээн дайынчыларының өг-бүлелериниң 38 кежигүнүнүң бижээн билдириишкини-биле, орнукшудулга акшазын шилчидип эгелээн. Ам-даа 10 билдириишкин ээлери херек документилерин чыып турары-биле, бо неделя төнчүзүнде төлевирин алыр. Өске регионнарда ышкаш, республиканың эрге-чагыргазы тускай шериг операция киржикчилериниң ол категорияда дайынчыларының төрээн кижилеринге ындыг төлевирлиг деткимче хемчээн көргүзер шиитпирни хүлээп алган.

Тыва Республиканың Чазаа июнь 1-де, "Вагнер" ХШК дайынчыларын орнукшударынга 100 муң хемчээлдиг чаңгыс удаа бээр регионалдыг төлевирни кылдырарын бөдүүнчүдер чурумну хүлээп алган. ТШО киржикчилериниң, ооң санында вагнержилерниң, төрээн кижилеринге ындыг деткимче хемчээн бээр талазы-биле ооң мурнунда хүлээп алган документиде, сөөлгү албан эрттирген черинден, бо таварылгада “Вагнер” ХШК-тан шынзыдылга бижикти албан киирер дугайында негелдени айыткан. Хуу компания ындыг документ бербээнинден, чок болган вагнержилерниң өг-бүлелери ындыг шынзыдылга бижикти берип шыдавас болган.

Чок болган “вагнержиниң” чоок улузу ол кижиниң өлген черин база ооң чылдагаанын айыткан тус черниң ХБАБ органындан справканы кожарын чаа чурумда доктааткан.
"Вагнер" ХШК одуруунга шериг албанын эрттирип тургаш мөчээн таварылгада, Коми, Марий Эл, Хакас республикаларда база Владимир облазында регионалдыг төлевирлерни доктааткан.

"Вагнер" ХШК одуруунга боттарының сөөлгү хүлээлгезин эрес-дидим күүсеткен дайынчыларның төрээн болгаш чоок кижилери регионалдыг төлевирлерни Күш-ажыл болгаш социал политика яамызынга долдуруп болур: Кызыл хоорай, Московская кудумчузу, б. 2 (4 каът), телефону - 8(39422)3-05-99.