Тываның Баштыңы республиканың эмчи ажылдакчыларынга профессионал байырлалы-биле байырны чедирген

Владислав Ховалыг бодунуң соцчеткиде блогунга кадык камгалал адырында ажылдап турар ажылдакчыларга байыр чедирген. Эмчи ажылдакчыларын база бир эң-не кол болгаш буянныг мергежилдиң төлээлери деп ол демдеглээн. Байыр чедириишкининге Донбасста дайынчы хөделиишкиннер чоруп турар зонага тыва эмчилер боттарының профессионал хүлээлгезин дидими-биле күүсеткенин онзагайлап демдеглээн

— Эмчи ажылынга чүгле делгем билиглиг, эки сеткидиг кижилер ажылдап шыдаар дээрзинге бүзүрээр мен, чүге дээрге силер боттарыңарны бодавайн, өскелерге дуза кадарынга кезээде белен болгай силер. Шак ындыг үлегерни дайынчы хөделиишкиннер болуп турар черниң кызыгаарынга четкеш келген бистиң эмчилеривис көргүскен. Коллегаларынга дуза хереглеттинип турарын билип каан дораан, боданмайн-даа олар чорупканнар — деп, губернатор бижээн.

Тывадан бөлүк эмчилер Луганск, Донецк републикаларның чонунга болгаш тускай шериг операциязының киржикчилеринге эмчи дузазын чедирери-биле 2022 чылдың декабрьда болгаш апрельде, ийи удаа чорааш келген. Ол бөлүктерже хирургтар, травматологтар, ортопедтер, анестезиологтар, кезиишкин үезинде дуза кадар эмчи сестралары кирип турган. Тываның эмчилери карак кызыл ажылы дээш РФ-тиң Президентизиниң Өөрүп четтириишкин бижиин болгаш Тыва Республиканың күрүне шаңналдарын алган.

Владислав Ховалыг кадык камгалалының хоочуннарынга үнелеп четпес байлак дуржулгазын аныяктарга дамчыдып берип чорууру болгаш боттарының соондан өзүп олурар төлептиг салгалды белеткеп турары дээш аңгы четтиргенин илереткен.
Тываның Чазак Даргазы республиканың эмчи ажылдакчыларынга аас-кежикти, быжыг кадыкшылды болгаш бүгү-ле чүүлдеринге экини күзээн.

Эмчилерниң профсссионал байырлалының бүдүүзүнде ол адырның ажылдакчыларынга Тыва Республиканың күрүне шаңналдарын тывыскан.
Кадык камгалал адырының дараазында ажылдакчылары: Республиканың 1 дугаар эмнелгезиниң гастроэнтерология салбырының эмчи сестразы Наталья Тожаевна Кенден; “Суд-эмчи экспертизазының бюрозу” республика албан чериниң санитары Евгения Васильевна Батурина; Туберкулезка удур диспансерниң кезиишкин салбырының эмчи сестразы Урана Домур-ооловна Ондар; Бии-Хемниң төп кожуун эмнелгезиниң дерматовенеролог эмчизи Оксана Викторовна Цыбина; ТР-ниң Перинаталдыг төвүниң чаа төрүттүнген чаштарның реанимация база интенсивтиг терапия салбырының эмчи сестразы Эмма Киим-ооловна Намзырай ТР-ниң Чазааның Даргазының Өөрүп четтириишкин бижиктери-биле шаңнаткан.

Тыва Республиканың Чазааның Даргазының Хүндүлел бижии-биле кадык камгалал адырының дараазында ажылдакчыларын: республиканың туберкулезка удур диспансериниң фтизиатр эмчизи Орланмаа Чамзырыновна Донгак; республиканың халдавырлыг аарыглар эмнелгезиниң анестезист эмчи сестразы Маргарита Дадаровна Оюн база эмчи сестразы Эмма Эрес-ооловна Удун-оол; Улуг-Хемниң хөй талалыг эмнелге төвүнүң анестезист эмчи сестразы Сара Доржуевна Кара-Сал; Каа-Хемниң төп кожуун эмнелгезиниң инфекционист эмчизи Родина Иргитовна Хертек; Кызыл кожууннуң төп эмнелгезиниң педиатр эмчизи Валентина Домур-ооловна Тулушту шаңнаан.

Кадык камгалал системазының сайзыралынга үлүг-хуузу, хөй чылдарда ак сеткилдиг күш-ажылы дээш “Тыва Республиканың кадык камгалалының алдарлыг ажылдакчызы” хүндүлүг аттарны Бии-Хемниң төп кожуун эмнелгезиниң Аржаан суурда ФАП-тың фельдшери Елена Красиновна Инюткинага; республиканың СПИД болгаш халдавырлыг аарыгларга удур профилактика төвүнүң улуг эмчизиниң организастыг-методика ажылының талазы-биле оралакчызы Римма Буруткеловна Сарыг-Серенге тывыскан.

“Тыва Республиканың алдарлыг эмчизи” деп хүндүлүг атка республиканың уруглар эмнелгезиниң социал, медицина талазы-биле дузалаар салбырның эргелекчизи Зинаида Дыртыковна Монгуш, 1 дугаар республика эмнелгезиниң карак эмнээр салбырының эргелекчизи, офтальмолог эмчи Николай Григорьевич Утямишев, республиканың 1 дугаар эмнелгезиниң улуг эмчизиниң эмнээшкин талазы-биле оралакчызы Луиза Шыыраповна Сундуй, республиканың дүрген дуза чедирер төвү болгаш айыыл-халап медициназының улуг эмчизи Шолбан Алдын-оолович Сарыглар олар төлептиг болганнар.

Республиканың медицина колледжиниң башкызы Екатерина Сергеевна Полетаеваны кадык камгалал системазынга хөй чылдарда ак сеткилдиг күш-ажылы дээш Тыва Республиканың “Шылгараңгай күш-ажыл дээш” деп медаль-биле шаңнаан.

Хөй чылдарда ак сеткилдиг ажылы болгаш кадык камгалал адырында бедик чедиишкиннери дээш “Кадык камгалалының тергиини” деп хөрек демдээн Республиканың уруглар эмнелгезиниң педиатр эмчизи Марина Кушкаш-ооловна Дамчат-оолга тывыскан.

РФ-тиң Кадык камгалал яамызының Хүндүлел бижии-биле “Серебрянка” санаторийиниң эмчи сестразы Любовь Адыг-ооловна Ооржак болгаш республиканың 1 дугаар эмнелгезиниң улуг эмчи сестразы Чойганмаа Калзын-ооловна Шагбажааны шаңнаан.

Республиканың Перинаталдыг төвүнүң кол эмчизиниң педиатрия талазы-биле оралакчызы Айдын Алексеевич Монгуш, ол ышкаш республиканың 1 дугаар эмнелгезиниң кол эмчизиниң оралакчызы, хирург эмчи Айдын Эресович Серен-оол, 2 дугаар кезиишкин салбырының хирург эмчизи Алдын-Херел Борисович Монгуш, реанимация болгаш интенсивтиг терапия салбырының анестезиолог-реаниматолог эмчизи Дмитрий Робертович Ондар, арын-чаак кезер салбырның стоматолог-хирург эмчизи Сылдыс Херел-оолович Олчейбен, кезиишкин салбырының травматолог-ортопед эмчизи Маадыр Радионович Куулар, травматолог-ортопед эмчизи Дмитрий Олегович Кыргыс 2022 чылдың апрельде Луганск Улус Республиканың чурттакчыларынга база шериг албанныгларга эмчи дузазын көргүскени дээш Россия Федерациязының Президентизиниң Өөрүп четтириишкин бижиин алганнар. 

Оон аңгыда, РФ-тиң Президентизиниң Хүндүлел бижии-биле Перинаталдыг төптүң акушер-гинеколог эмчизи Саяна Дум-ооловна Сарыгларны шаңнаан. Ол-ла эмнелгениң акушер-гинеколог эмчизи Любовь Сергеевна Омзаар “Россия Федерациязының алдарлыг эмчизи” деп атка төлептиг болган.