Тываның делегациязы Петербургтуң экономиктиг делегей форумунуң шөлүнде «Улуг Сибирь» коллективтиг делгелге ажыдыышкынынга киришкен

Петербургтуң экономиктиг делегей форумунда Сибирь федералдыг округтуң субъектилери «Улуг Сибирь» коллективтиг делгелгени ажыткан. РФ-тиң Чазааның Даргазының оралакчызы Виктория Абрамченко, Тыва Республиканың Баштыңы Владислав Ховалыгның удуртканы делегация дээш, Сибирь регионнарының төлээлери ооң ажыдыышкынынга киришкен.

Виктория Абрамченко форумнуң киржикчилеринге байыр чедирбишаан, аалчыларга болгаш инвесторларга саналдаар чүүлдер Сибирьниң регионнарында барын демдеглээн.
«Сибирьниң он регионнары дээрге, Улуг Сибирь-дир. Географтыг туружу, эртем болгаш кадрлар курлавыры, кайгамчык бойдус байлааның ачызында улуг хөгжүлдениң курлавырлары четчир, элбекшилдиг, күштүг, быжыг он регионнар-дыр»- деп, Абрамченко чугаалаан.

РФ-тиң Президентизиниң Сибирь федералдыг округунда бүрүн эргелиг төлээзи Анатолий Серышев форумнуң шөлдеринде Сибирь дөрт дугаар киржип, СФО регионнарының эрге-чагырга органнары «Сибирь дугуржулгазы» регионнар аразының ассоциациязының күүсекчи комитеди-биле кады күжениишкинниг ажылдап, таныштырылгада улуг белеткелди чорутканын демдеглээн.

Киирген санкциялардан 2022 чыл амыр эвес байдалда эртсе-даа, Россия продукция сөөртүлгезиниң логистика коридорун өскертип, чаа экономика партнерларын дилеп, хөгжүлдениң көргүзүглерин бадарын болдурбаан деп, ол демдеглээн. Эрткен чылын Сибирь эң-не хөй тараа дүжүдүн алган, регионнар чуртталга тудуун киирериниң хемчээлин улгаттырып, чамдык угланыышкыннарда чуртта ортумак өзүлдеден бедик темпини көргүскен.
«Идеологтуг удурланыкчылар бисти кошкадып, оларның негелделерин амыдыралга хүлээп алырын ыйытса-даа, Россия, ооң иштинде Сибирьниң регионнары өзүп, хөгжүп сайзырап турар» – деп, бүрүн эргелиг төлээ демдеглээн.

«Улуг Сибирь» стенд 213 дөрбелчин метр шөлдү ээлээн. Сибирь регионнарынга ада-чурт бизнезиниң база даштыкы партнерларның төлээлери-биле чугаалар чорудар, кады ажылдажылга керээлеринге ат салыр база бодунуң социал-экономиктиг курлавырларын таныштырар чер - коллективтиг делгелге шөлү ол болур.

Эрткен чылын Петербургтуң экономиктиг делегей форумунуң үезинде, округтуң федерация субъектилери 65 дугуржулганы чарган, оларның чүгле 23-үнче инвестицияларның ниити түңү 85 миллиард ажа берген.

Форум үезинде Тываның Баштыңы Владислав Ховалыг регионнуң социал-экономиктиг хөгжүлдезинче угланган кады ажылдажылга болгаш ниити төлевилелдер боттандырылгазының дугайында элээн каш чугула дугуржулгаларга атты салган, бөгүн тыва губернаторнуң ажыл-агыйжы ужуражылгалары болгаш дургужулгалары уламчылап турар.