Билайн биле Тыва Республиканың Чазаа регионнуң чурагайлыг экономиказын хөгжүдер

«ВымпелКом» ПАН (билайн бренд) база Тыва Республиканың Чазаа регионнуң чурагайлыг экономиказын хөгжүдеринче күжениишкиннерин катыштырган. Питерниң делегейниң экономиктиг форумунуң үезинде, ийи тала ооң мурнунда дугуржулгазын 5 чылда кады ажылдажылга керээзи-биле быжыглаан. Тыва Республиканың Баштыңы Ховалыг Владислав Товарищтайович биле «ВымпелКом» ПАН-ның күрүне сектору-биле ажылдаар департаментиниң удуртукчузу Звягинцев Михаил Владимирович документиге атты салганнар.

«Чурагайлыг экономика» национал төлевилел боттандырылгазы-биле ийи тала чурагайлыг экономика адырынга кады ажылдап, регионга ону хөгжүдер планныг. Тыва Республиканың чурагайлыг экономиказын, чурагайжыдылганы база чурагай эде тургузуушкунун хөгжүдеринче, информация-телекоммуникация инфраструктуразын, мобильдиг харылзаа четкизин сайзырадырынче удур-дедир кады ажылдажылганы угландырар. Ийи тала “угаанныг хоорай” демдектерин хевирлээр угланыышкында чаа информация-телекоммуникация технологияларын хөгжүдеринче, хамаатыларга ачы-дузаның шынарын бедидеринче угланган Wi-Fi, М2М, чаа технологиялар, аудио база видео аналитиказы дээн ышкаш технологияларны болгаш аргаларны, информастыг айыыл чок чорук сервистерин (DDos халдаашкыннардан база тарап-нептерээринден камгалал) бодунга ажыглаарынга чедимчелиг болган хемчеглерни боттандырарынга сонуургалдыг.

Регионда хамаатыларның айыыл чок чоруун база амыдыралының шынарын бедидер айтырыгларны шиитпирлээринге, регионалдыг болгаш социал ужур-дузалыг өске-даа хемчеглер эрттиреринге медээлер анализтээр технологияларны ийи тала ажыглаар болган. Турисчи агымны улгаттырарынга кылымал интеллектини ажыглаарын, ажылдап шыдаар чурттакчы чоннуң миграциязын шинчилээрин, транспорт инфраструктуразын хөгжүдерин, деңзилеп-хемчээр контрольду дөзевилеп, тударын дугуржулгада киирген.

Тыва Республиканың Баштыңы Владислав Ховалыг: «Регион чедери берге черлерлиг болгаш, харылзаа инфраструктуразын хөгжүдеринге сонуургалдыг бис. Чижээ, Бай-Тайга кожууннуң Кара-Хөл суурже удазын-оптиктиг харылзаа шугумун шөйеринге. Ынчангаш херек кырында биске дузалажыр күзелдиг партнерларга өөрүүр бис. Амгы үениң технологиялары амыдыралывысче чоорту кирип келген болганда, чурттакчы чонга ол болгаш өске-даа ачы-дузалар алырынга эптиг байдалдарны тургузар апаар. «ВымпелКом» чурагайлыг платформа компаниязы ол талазы-биле биске сонуурганчыг. Ынчангаш ам практиктиг кезээнче дүрген шилчиир херек».

Билайнның Тывада салбырының директору Павел Умнов: «Шиитпирлерниң артында кол сорулга – Билайнның Тывада ажыглакчыларынга чурагай сервистерин чедингир кылдыр кылыры, а ачы-дуза ажыглалын эң таарымчалыг болдурары. Бисти республиканың чазаа деткип турары, өөрүнчүг-дүр. Билайн-биле кады ажылдажылга чүгле күрүне секторунуң эвес, а регионнуң бизнезинге болгаш чурттакчыларынга делгем аргаларны ажыдып, сорулгаларын чедип алырынга дузалаар дээрзинге бүзүрээр мен».