Тывага “Азия төвүнде фанфарлар-2023” деп үрер хөгжүм оркестрлериниң IV дугаар делегей чергелиг фестивалы эгелээр

Июньнуң 15-тен 18-ке чедир Кызыл хоорайга “Азия төвүнде фанфарлар-2023” деп үрер хөгжүм оркестрлериниң IV дугаар делегей чергелиг фестивалы болуп эртер

РФ-тиң Камгалал яамызының Төп шериг оркестри (начальниги - Россияның алдарлыг артизи, полковник Сергей Дурыгин); Кызылдың Президентиниң кадет училищезиниң шериг  оркестри (дирижеру - ТР-ниң алдарлыг артизи Саян Салчак); 55-ки аңгы мото-адыгжы бригаданың шериг оркестри (дирижеру - Петр Черников), Тыва Республиканың Чазааның Т.Д. Тулуш аттыг үрер хөгжүм оркестри (дирижеру - ТР-ниң алдарлыг артизи Начын Донгак) хөгжүм байырлалының чыскаалынга киржир.
Хүндүлүг аалчылар - Моолдан дирижёрлар Бааст Тогсбаяр биле Сугар Сарыыл-од болгаш Красноярск хоорайдан Тыва Республиканың уран чүүлүнүң алдарлыг ажылдакчызы, Дмитрий Хворостовский аттыг Сибирьниң күрүнениң уран чүүл академиязының профессору Петр Казимир бөгүн Тывада чедип келгенин регионнуң культура яамызы дыңнаткан.

ТР-ниң Чазааның Тимур Дулуш аттыг үрер хөгжүм оркестриниң бо фестивальды Ада-чурттуң Улуг дайынынче тыва эки турачы танкычыларны аъткарганындан бээр 80 чыл оюнга тураскаадып эрттирер дээн саналын РФ-тиң Камгалал яамызы, ТР-ниң Чазаа, Культура яамызы, Үрер хөгжүм оркестрлериниң ассоциациязы деткээн.

“Азия төвүнде фанфарлар” фестивальдарга уругларның үрер хөгжүм оркестрлериниң киржилгези чаңчыл болу берген. Олар кезээде фестивальдың дең эргелиг киржикчилери болуп артпышаан. Үрер хөгжүм оркестрлериниң IV дугаар делегей чергелиг фестивалында “Енисейниң уруглары” деп I дугаар уругларның үрер хөгжүм оркестрлериниң мөөрейин чарлааны – чаа төлевилел болур. Россияның Культура яамызының деткимчезин алган Үрер хөгжүм оркестрлериниң ассоциациязының “С тобой, страна!” чогаадыкчы төлевилели-биле ону эрттирер. Красноярск край база Хакас Республикалардан уруглар оркестрлери аңаа киржир күзелин илереткен. Чалыы хөгжүмчүлер мөөрейге киржиринден аңгыда, “Азия төвүнде фанфарлар” фестивальдың программазында кирген улуг концерттерге база киржир.

Июньнуң 16-да, Тыва Республиканың Чазааның Т.Д. Тулуш аттыг үрер хөгжүм оркестриниң 15 чылынга тураскааткан концертке хөгжүмчүлерниң өңнүктери – ат-сураглыг хөгжүмчүлер болгаш дирижерлар Тимофей Маякин, Сергей Дурыгин, Бааст Тогсбаяр, Петр Казимир, Юрий Меркулов, Юрий Здрогов, Андрей Штарк, Михаил Пидручный, Людмила Голубева, Сугар-Сарыыл-од киржип, көрүкчүлерни өөртүр.

Июньнуң 17-де, “Енисейниң уруглары” деп I дугаар уругларның үрер хөгжүм оркестрлериниң мөөрейиниң тиилекчилерин шаңнап мактаар. Ол-ла хүн Чадаана хоорайга, фестивальдың уран чогаадыкчы удуртукчузу, РФ-тиң Чепсектиг күштериниң шериг-оркестр албанының начальниги, кол шериг дирижёр, генерал-майор, Россияның алдарлыг артизи Тимофей Маякинниң башкарылгазы-биле шериг оркестрниң концерти болуп эртер.

Шупту концерттер 19 шакта эгелээр, ТР-ниң Культура яамызының курлавырларында парлаан тускай шөлүглеринден билеттерни халас ап болур: https://vk.com/tuvacult?w=wall-20358661_57504