Тывада тускай шериг операциязының киржикчилериниң ажы-төлүнге хоорайдан дашкаар дыштанылга лагерилеринче путевкаларны тускайлаан

Регионнуң Баштыңы Владислав Ховалыгның даалгазы езугаар, ведомство тускай шериг операциязының киржикчилериниң ажы-төлүнге кадыкшылга дыштанылгазын организастаар. Республика эрге-чагыргазының детикимчези-биле ачалары фронтуда 459 оолдар «Байлак», «Бельбей», «Орлёнок» база «Чагытай» лагерьлеринге дыштанырлар.

ТР-ниң Күш-ажыл яамызының удуртулагзынга ийи стационар лагерь: Мөңгүн-Тайга кожуунда «Менги Чечээ» биле Таңдыда «Байлак» лагерьлери тус-тузунда 50 биле 232 олутту тускайлаан. Ведомство чылдың-на чиигелделиг өг-бүлелерниң ажы-төлүнге, өскүс уругларга, кадыкшылы кызыгаарлыг уругларга, социал айыылдыг байдалда уругларга путевкаларны немей садып ап турар. Бо чайын 870 оолдар, уругларны чиигелделиг путевкалар-биле дыштандырар.

Оон аңгыда, ТШО-да мобилизастаттынган база эки турачыларның, “Вагнер” ХШК шериглериниң ажы-төлүнге «Байлак», «Бельбей», «Орлёнок» база «Чагытай» дыштанылга лагерьлеринче 459 путевканы үлээрин күш-ажыл сайыдының оралакчызы Чечена Дудуп дыңнаткан. Уруглар стационар лагерьлерге июньнуң 15-тен эеглеп, үш сезонда кадыкшылын быжыглап дыштанырлар.

Күш-ажыл яамызының шугумунда стационар лагерьлерден аңгыда, Өг-бүлеге болгаш уругларга социал дуза төптериниң баазазында хүндүскү лагерьлерге уруглар дыштаныр. Күш-ажыл яамызының шак ындыг ведомство төптери республиканың муниципалдыг тургузугларында  ажылдап турар. Хүндүскү лагерьге уруглар 8.00 шактан 16.00 шакка чедир хүнзээр. Хүндүскү лагерьже хөй ажы-төлдүг болгаш эвээш орулгалыг өг-бүлелерден уругларны бирги ээлчегде хүлээр. Күш-ажыл яамызының шугуму-биле чиигелделиг бөлүкте кирип турар 2498 уруг чайгы лагерьлерге дыштанырлар.