Тываның Баштыңы республиканың хөгжүлдезинге улуг үлүг-хуузун киириштирген хоочуннар-биле ужурашкан

Тываның хоочуннары хөй-ниитижи, дагдыныкчы ажылдарга кезээде идепкейин көргүзүп чоруур. Оларны чүгле хуу эвес, а ниити республика айтырыглары дүвүредип турар.

Республиканың улуг назылыг хоочуннары-биле ужурашканын Тываның Баштыңы Владислав Ховалыг бодунуң телеграмм-каналында бижээн.
«Республиканың хөгжүлдезинге хамаарышкан айтырыгларга оларның бодалдарын дыңнадым. Чурттаар оран-сава болгаш социал объектилер тудугларын шудургу тудар талазы-биле улуг комплекстиг хемчеглер алдынып турарын чон көрүп турарынга өөрүүр-дүр мен» - деп, В. Ховалыг бижээн.

Бирги түңнелдер ылап-ла бар. Республиканың чурттакчыларында чурттаар оран-савазын экижидип алыр аргалар тыптып эгелээн. Ниитизи-биле чурттаар оран-сава рыногу калбарып, уруглар садтарында болгаш школаларда чаа олуттар тургустунуп эгелээн.

Ол ышкаш ужуражылга үезинде кадрлар политиказынче база кичээнгейни угладывыс. Республикада аныяк удуртукчулар белеткээр программа кошкак сайзырап турар дээрзин хоочуннар демдеглээн. «Мурнунда салгалдың кадрлар четчелээр, кижизидер дуржулгазын амгы үеде ажыглаар херек. Ол угланыышкын-биле ажылдаар бис» - деп, губернатор келир үеде планнары-биле үлешкен.

Ол ышкаш суурларның инфраструктуразын база көдээ ажыл-агый бүдүрүлгезин хөгжүдеринче хоочуннар кичээнгейин угландырган. Амгы үеде Тывада материал-техниктиг парк боттуг чаартынып турар, ылаңгыя тараа ажаар комбайннар болгаш тараа тарыыр агрегаттар. Фермерлерге тараа шыгжаар складтар тудуп алырынга субсидияларны болгаш грантыларны берип турар, селекция-уксаажыдылга ажылдары чоруп турар деп, Владислав Ховалыг демдеглээн.

«Республиканың хөгжүлдезинге хамаарышкан айтырыгларны үре-түңнелдиг сайгарып чугаалашканывыс дээш хоочуннарга болгаш аныяктарга өөрүп четтирер-дир мен. Дыка хөй саналдарны демдеглеп алдым, сайыттар-биле адыр айыын өөренип көөр бис» - деп, В. Ховалыг түңнээн.