Тываның Баштыңы Владислав Ховалыг Россия хүнүнде республиканың чалыы хамаатыларынга паспорттарны тывыскан

Тывага июнь 12-ниң эртени чуртуң бүгү-ле регионнарында ышкаш, чаагай чаңчыл-биле эгелээн. Арат шөлүнге, Россия хүнүнге – РФ-тиң күрүне бот-дугуннаашкынының декларациязын хүлээп алган төөгүлүг хүнге алдар болдуруп Россия Федерациязы биле Тыва Республиканың күрүне туктарын көдүрер езулал болган. 

Тываның күрүне университединиң Шериг-өөредилге төвүнүң төлээлери тукту көдүрер эргени алганнар. Байырлыг езулалга Тываның Баштыңы Владислав Ховалыг баштаан Чазак кежигүннери болгаш ТР-ниң Дээди Хуралының (парламентиниң) депутаттары, федералдыг эрге-чагырга органнарының республика болгаш регионалдыг шериг кезектериниң удуртукчулары, хөй-ниитижилер болгаш чурттакчы чон киришкен.

Туктар көдүрер езулал соонда Тываның Баштыңы Владислав Ховалыг биле Республиканың Дээди Хуралының даргазы Каң-оол Даваа Тываның элээди чурттакчыларынга Россия Федерациязының хамаатызының паспорттарын байырлыг байдалга тывыскан. Өөредилгеге, спортка, чогаадыкчы болгаш хөй-ниити ажылдарынга онза чедиишкиннерлиг респубиканың беш школачызы: Марина Монгуш, Анастасия Тряскина, Таир Кыныраа, Аэлита Куулар болгаш Фёдор Очур Россия Федерациязының хамаатызының папорттарын холга ап, байырлалдың маадырлары болган.

Тываның Баштыңы Владислав Ховалыг социал четкилерде бодунуң блогунга Россия хүнү-биле чаңгыс чер чурттугларынга байырын чедирген. Ол республиканың чурттакчыларга кадыкшылды, чечектелиикшинни, чаа-чаа чедиишкиннерни күзеп, Россияның премьер-министри Михаил Мишустин база чурттуң камгалал сайыды Сергей Шойгудан Тываның чонунга чедирген байыр чедириишкинин үлешкен. 

Бөгүнгү байырлал бистиң хөй националдыг чуртувустуң күчүлүг эрткен үезинге чоргаарланып, ооң амгы болгаш келир үезин тургусчуп чоруур кижилерни каттыштырган деп, регионнуң баштыңы демдеглээн. Чоннуң хей-аъды, эп-найыралы болгаш чаңгыс деми бистиң күрүнени кезээде камгалап чорааны төөгүде арткан, деп ол чугаалаан. Владислав Ховалыг агаар-бойдустуң уржуундан, бо хүннерде берге байдалда таварышкан улуска дузазын кадып келген кижилерге четтиргенин илереткен. "Бо хүннү оперативтиг байдалды сайгарган чазакта онза байдалдар талазы-биле комиссияның хуралындан эгеледивис" – деп губернатор дыңнаткаш, соцчеткилер таварыштыр хүлээп алдынган хемчеглерни дарый дыңнадырын ол аазаан.