Тываның Баштыңы социал болгаш орук инфраструктуразының объектилер тудуун дүргедедир даалганы берген

Тывада чугула социал болгаш орук тудугларының акшандырыышкынын мурнады хандырар. Ынчалдыр республиканың чазаа бюджет чээлизи кылдыр немелде саң-хөөнү берип болур объектилерни федералдыг даңзыже киирерин чедип алган.
Бөгүн Тываның Баштыңы Владислав Ховалыг ТР-ниң Саң-хөө яамызының белеткээни бюджет бижилгезинче чогуур өскертилгени киирер дээн шиитпиринге атты салган.
Бадылаттынган графиктен мурнады беш объектини акша-хөреңги-биле хандырар: ооң үжүн 2023 чылда, артканын - 2024 чылда. Балгазын суурда база Кызыл хоорайның “Вавилин ээтпээ” микрорайонда школалар, Хүт суурда фельдшер-акушер пунктузунуң тудуу база Самагалтай суурда уруглар поликлиниказының капитал септелгези аңаа хамааржыр. Оон аңгыда, оруктар септелгезинче база тудуунче немелде акшаландырыышкын көрдүнген.
Республика тудугларын дүргедедиринче ниитизи-биле 949,2 млн. рубль казначей чээлизин алыр.
Россияның президентизи Владимир Путин тудугнуң шапкын темпизин деткиир дээш, инфраструктура тудугларын мурнады акшаландырар механизмни 2023 чылдың эгезинде саналдаанын сагындыраал. Бөгүн регионнар ооң ачызында, бюджет дугайында хоойлу-биле бо чыл төнчүзүнде азы келир чылын казначей чээлилериниң акша-хөреңгизин ап, ону тудугже ажыглаар аргалыг.