Өвүр кожуунда көдүрүлген хем суунуң чууй шаап апарганы көвүрүг участогун катап кылып турар

Тывада хенертен изип келирге, дагларда харлар эрип батканындан хемнер суу көдүрүлген. Регионнуң орук-транспорт албаннары Тывада Хандагайты - Мугур-Аксы база Хандагайты - Ак-Чыраа автооруктарын, ылаңгыя Дус-Хөлче баар Торгалыг хемни кежир көвүрүгнүң оруун суг чууй шаап апарганы демдеглеттинген.

Хандагайты - Ак-Чыраа орукта сугга алыскан участоктап транспорт шимчээшкинин дуглап, сагындырыг демдекти тургускан. «Өвүрнүң ОТСУ» КХН объектини хыналдада алган. Суг ам-даа көдүрлүп турарындан, орук организациязының специалистери ол участокта хондур дежурныйлаашкынны организастаан.

«Дус-Даг биле Ак-Чыраа суурнуң чурттакчылары чугула херектиг апарза, «Самагалтай – Ак-Чыраа» автооруу-биле чорааны дээре. Орук-транспорт комплекс яамызының дыңнадыы-биле алырга, ол участокта оруктуң байдалы ажырбас – деп, Тываның Баштыңы Владислав Ховалыг бодунуң блогунда бижээн. – Ол черже дораан үнүп, катап септелге ажылдарын дарый эгелээни дээш, Орук-транспорт яамызынга база орук албаннарынга четтиргеним илереттим. Сугнуң агымын түр када көвүрүгден өскээр чаяр дээн шиитпирни специалистер хүлээп алган, чүге дизе амгы үеде көдүрүлген суг көвүрүгже сай-довурак төгер ажылдарны эгелээринге шаптыктап турар».

Тываның Баштыңы регионнуң муниципалдыг тургузуглар даргаларынга база орук-транспорт комплекизиниң яамызынга сугга алзып болур зонада шупту оруктарны болгаш көвүрүглерни дүн-хүн чокка мониторингилээр даалганы берген.

2021 чылдан бээр Тывада сугга алзыптар оруктар участоктарының саны 27-ден 16 чедир кызырылганын республиканың орук-транспорт комплекизиниң сайыды Шораан Чыргал-оол дыңнаткан. Орук-транспорт яамызы шак ындыг орук участоктарын бүрүнү-биле кылыр сорулганы мурнунда салган.