Тывада орус дыл башкыларның ассоциациязы «Пушкин диктантызынче» чалап тур

Июнь 6-7 хүннеринде Тыва Республиканың Орус дыл болгаш чогаал башкыларының ассоциациязы ТР-ниң Өөредилге яамызының деткимчези-биле X дугаар делегей чергелиг “Пушкин диктантызы 2023” чырыдыышкын акциязын эрттирер.

Диктантының онаалгаларын орус дыл болгаш чогаал башкылары мөөрей хевиринге тургускан. Ону күүседиринге чүгле билиглер эвес, угаангыр-сагынгыр, чогаадыкчы болуру чугула деп, организаторлар сагындырган. Диктант  45 минута үргүлчүлээр.

Акцияга 1-ден 11 класстың өөреникчилери, ортумак болгаш дээди өөредилге черлериниң студентилери, библиотекарьлар, башкылар, ада-иелер киржип болур. Онаалгаларны шуптузун назы-хар болгаш даштыкыдан киржикчилерге орус дылды билириниң аайынче таарыштыр тургускан.

Бо чылын ук акцияның кол шөлчүгежи Тыва республиканың лицей-интернады болур. Республиканың найысылалынга база кожуннар төптеринге диктант бижиир немелде шөлчүгештер ажыттынар. Дүъш турда ону бижип эгелээр. Кызылда немелде шөлчүгештерге күрүне лицейи, 15 дугаар лицей, 12 дугаар школа, 5 дугаар гимназия, 11 дугаар школа хамааржыр. Ол ышкаш Бии-Хем кожууннуң 2 дугаар школазынга, Таңдының Сосновка, Чөөн-Хемчик кожуунда Чадаананың 2 дугаар, Чеди-Хөлдүң Хову-Аксының школаларынга база болур. Шагаан-Арыгның 1 дугаар, Ак-Довурактың 1 дугаар школаларының хүндүскү лагерьлериниң баазазынга база эрттирерин планнаттынган.

Александр Сергеевич Пушкинниң төрүттүнген хүнүнге тураскааткан “Пушкин диктантызы” деп акцияны чылдың-на июнь 6-да чурттуң бүгү-ле регионнарынга орус дылды болгаш улуг орус чогаалчының чогаалдарын нептередир сорулгалыг эрттирип турарын сагындыраал. Чылдың-на ук акцияга 10 муң ажыг кижи киржип турар. Чылдан чылче ооң киржикчилери көвүдеп турар.