Тываның муниципалитеттеринде чаа удуртукчуларны соңгаан

Муниципалдыг тургузугларның Төлээлекчилер хуралдарының депутаттарының шиитпири-биле республиканың Ак-Довурак хоорай база Тес-Хем кожуун чагыргаларының чаа удуртукчуларын томуйлаан.

Тес-Хем кожуун чагырга даргазының хүлээлгезин Олег Чангы-оол күүседир кылдыр томуйлаткан. Тес-Хем кожууннуң Берт-Даг чурттуг Олег Санхоевич 1988 чылда Красноярскиниң политехниктиг институдунга «инженер-механик» мергежилди чедип алган. Төрээн Тес-Хем кожуунунуң «Чодураа» совхозунга күш-ажылчы намдарын эгелээн. «Самагалтай» септелге-техниктиг бүдүрүлгезинге кол инженерлээн. «Тувапосредкомпания», «Продснаб» хуу бүдүрүлгелерни удуртуп, хууда сайгарлыкчы чорук-биле ажылдаан. 2019 чылдан тура «Агросоюз» КБК-ны башкарган. Республиканың көдээ ажыл-агый сайыдының оралакчызы эрге-дужаалды ээлеп тура, көдээ ажыл-агыйын хөгжүдүп сайзырадыр айтырыгларны бөгүнге чедир харыылап турган.

Ак-Довурак хоорай округунуң Төлээлекчилер хуралының депутаттарының шиитпири-биле, Андрей Алдын-оолович Сат хоорай чагыргазының даргазы албан-хүлээлгени күүседип эгелээн. Чөөн-Хемчик кожууннуң Чыргакы суурнуң чурттакчызы Андрей Сат хамааты күрүне албанында ажылдаан улуг арга-дуржулгалыг. Чаа албан-дужаалга томуйладырынга чедир Ак-Довурак хоорай чагыргазының составынга ажылдаан. 1995 чылда спорт комитединиң даргазындан эгелээш, чагырга даргазының хөй-ниити каттыжыышкыннарының ажыл-чорудулгазын дүүштүрер оралакчызынга чедир ажылдаан. 2006 - 2011 чылдарда - Ак-Довурак хоорай округунуң баштыңы – Төлээлекчилер хуралының даргазы. Республика сайгарлыкчыларның эрге-ажыын камгалаар ажыл-чорудулганы чорудуп турган.