Тываның чурттакчылары чат-боттар таварыштыр арага чажыт садып турар 44 черни илереткен

Тыва республиканың Баштыңы Владислав Ховалыгның инициативазы-биле арага чажыт садыглаашкынының дугайында дыңнадыгларны бижиир кылдыр билдингир «Вайбер» биле «Телеграм» мессенджерлерде «Тываның идепкейлиг хамаатызы» чат-ботту бо чылдың мартта ажыткан. Чат-бот ажылдап эгелээнден үш ай дургузунда, республикада чажыт арага садып турар 44 чер илереттинген.
Сагыжы дүвүреп чоруур хамаатыларның ачызында, хоойлуга чөрүштүр арага садып турар 37 садыг объектилерин база чеди «адрести» илереткен. Эң-не хөйү Кызылда – 17 точка, Кызыл кожуунда – 9, Чөөн-Хемчикте – 4, а арткан кожууннарда бирден үш чедир точкалар бар.
Кожуун чагыргазының специалистери, полицияның участок төлээлери база улусчу дружина кежигүннери арага садып турар деп дыңнадыгларны хынаары-биле рейдилерже үнген.
Хыналданың түңнелинде хоойлуга чөрүштүр эзиртир суксуннар садып-саарып турган дараазында садыг ээлеринге административтиг протоколдарны тургускан: Ак-Довурак хоорайда «Сайзанак» база «Юность» садыглар, Бояровка суурда аъш-чем садыы, Шемиде «Ассорти», Эрзин суурда Пионерская кудумчузунда «адрес», Кызыл-Мажалыкта Хаажык кудумчузунда садыг база өске-даа точкалар.
Республиканың найысылалында чаңгыс эвес удаа чурум үреп турган «У дачи» база «Аржаан» садыгларже харыысалгалыг ведомстволар онза кичээнгейни углап, Кызыл хоорайның прокуратуразы негелде билдириишкинни судче киирген. «Тарыс», «Сай», «Мясоделофф», «Наливали», «Мое желание» садыг ээлеринге база өске-даа точкалар база «адрестер» ээлеринге онааштыр административтиг протоколдарны тургускан.
Бүгү республикадан 30 ажыг садыг объектилери эрге-чагырга черлериниң контролюнда. «Телеграмм»-да http://t.me/aktivnyi_grazhdanin_bot база «Вайбер»-де – https://watbot.ru/w/o6t шөлүглер таварыштыр чажыт арага садып турар черлер дугайында дыңнадып болур.
Чат-боттарга чүгле чажыт арага садыглаашкынының дугайында эвес, а назы четпээннерге арага сатканының база эзирик ада-иелерниң ажы-төлүн айыылдыг байдалда арттырганының дугайында дыңнадып болур.