Тывага «Билиг. Депшилге» аныяктар форуму болуп эрткен

“Билиг” российжи ниитилел Тываның күрүне университединге аныяктар форумун организастап эрттирген. Психологтар, маркетологтар, сайгарлыкчылар, төлевилелдер удуртукчулары, хөй-ниити ажылдакчылары амгы үеде албан-ажылга алызы барып депшиирин регионнуң студентилери-биле сайгарып чугаалашкан.
Тыва Республиканың Чазааның даргазының оралакчызы Орлан Сарыглар база ТывКУ-нуң ректору, «Билиг» ниитилелиниң регионалдыг салбырының даргазы Ольга Хомушку ук хемчегни ажытканнар.
- Тыва Республиканың Баштыңы Владислав Ховалыгның өмүнээзинден силерге байыр чедирип тур бис. “Билиг. Депшилге” – профугланыышкын база сайгарлыкчы чорук талазы-биле бисте бир дугаар эртип турар улуг чырыдыышкын төлевилели болур. Ылаңгыя Тывада бисте, аныяктар шимчедикчи күш турган болгаш, артар-даа. Республиканың чурттакчы чонунуң 31 хуузун – 14-тен 35 харлыг аныяктар ээлеп турар. Бистиң сорулгавыс – оларның угаан-медерел болгаш профессионал хөгжүлде-сайзыралынга байдалдарны тургузуп бээри болур. Бөгүн дыка хөй ажыктыг информацияны, арга-мергежилди болгаш билиглерни шиңгээдип билип алыр силер. Шупту арга-мергежилдер амыдыралыңарга ажыктыг апаарынга бүзүрээр мен – деп Орлан Сарыглар форумнуң киржикчилеринге чугаалаан.
Форумнуң ажылын үш аңгы кезекке тургускан: «Сайзырал», «Карьера» болгаш «Бизнес база стартап». Форумнуң программазында лекциялар, мастер-класстар, карьера тургузар адырда эксперттер - арга-дуржулгалыг дагдыныкчыларның илеткелдерин киирген.
«Лекторлар лигазы» конкурстуң тиилекчизи Игорь Носов, Россияның Экономиктиг хөгжүлде яамызының бүгү-Россияның даштыкы садыглаашкын академиязының башкызы Алексей Закальскис, методист Екатерина Сысоева, клиниктиг психолог Илья Благов, Skillbox маркетинг методологтарының удуртукчузу Юлия Прокофьева, «Россельхозбанк» АН Тываның регионалдыг филиалының башкарыкчызы Сарыглар Чинчи форумнуң киржикчилериниң мурнунга сөстү алган.
Эрткен чылдың чазынында эгелээн аныяктарның ажыл-албан депшилгелериниң форумнары 2023 чылда уламчылаар. Россияның аңгы-аңгы хоорайларынга онлайн- болгаш офлайн-форумнар үезинде аныяктар федералдыг улуг компанияларның төлээлери-биле ужуражып, сайгарлыкчы чедиишкинниң төөгүзүн дыңнап, боттарының билиин шылгаары-биле экспресс-чугаалажылганы эртип, арга-дуржулгалыг HR-специалистерниң киржилгези-биле бирги резюмелерни тургузуп, а чамдык киржикчилер ажылче чалалгаларны алыр.