Владислав Ховалыг: Туранда парк - орус биле тыва чоннарның тургузукчу күш-ажылының быжыг доңу

Республиканың Баштыңы Владислав Ховалыг Тываның Бии-Хем кожуунунуң төвүнге көжүп келген баштайгы орус чоннуң парыгын ажыдар езулалга киришкен. Губернатор онзагай хүн-биле бии-хемчилерге байырын дамчыдып, төрээн хоорайының төөгүзүн кадагалап арттырар дээн сорук кириишкини болгаш чүткүлү дээш өөрүп четтиргенин илереткен. Биче хоорайлар болгаш төөгүлүг суурларда таарымчалыг хоорай хүрээлеңин тургузар дээн тулган төлевилелдерниң бүгү-российжи конкурузунуң тиилекчизи болган төлевилелдиң үндезинин Туранның кайгакчык төөгүзүн камгалап арттырар дээн инициатива ээлээн. Июнь 1-де уруглар болгаш аныяктарга байырлал программазының кол кезээ - хоорайның тураскаалдыг чаа черин ажытканы болган.
Владислав Ховалыгның бодалы-биле алырга, Туран хоорайның 138 чылдаанында ажыдар чаа хөй-ниити шөлү Тывага көжүп келген бирги орус кижилерниң төөгүлүг улуг өнчү салгалы апаар.
- Бо парк Россияның составынче Тываның киреринге хөйнү кылган кижилер дугайында сактыышкынның, орус болгаш тыва чоннуң бот-боттарынга хүндүткелдиг хамаарылгазының болгаш эп-найыралының, тургузукчу күш-ажылды база культураны кады байлакшыдарының символу болур – деп, губернатор демдеглээн.
Республиканың удуртукчузу Уруглар камгалалының хүнүнде ажыттынган паркче кичээнгейни угландырган:
- Уруглар болгаш аныяктар төрээн хоорайының база республиказының төөгүзүн билип, чоннарның эп-найыралының үлегер чижээн көрүп, боттарының дыштанылгазынга база сайзыралынга девискээр кылдыр көрүп турар – деп, Ховалыг демдеглээн.
Тываның баштыңы парк ажыдыышкынында келген оолдар, кыстарга Уруглар хүнү-биле байырны чедирип, ада-иелеринге ынак болуп, улугларга дузалажып, шынчы эш-өөрлерин үнелеп, эки өөренип база Төрээн чуртунга ынак болурун чагаан.
«Бир дугаар көжүп келген орус чоннуң парыгы» төлевилел 2018 чылда биче хоорайларда болгаш төөгүлүг суурларда таарымчалыг хоорай хүрээлелдин тургузар тулган дээн төлевилелдерниң бүгү-российжи конкурузунга тиилээнин сагындыраал. Эрги хоорайның парк зоназын эде чаагайжыдар улуг ажылдар бо чылын доозулган.
Хоорайның төөгүзүн тускай аян-шинчи-биле парктың чаагайжылдылгазында көргүскен. Паркта орус казанакты база тыва өгнү тиккен, мурнуу-чөөн талазында Иннокентий Георгиевич Сафьяновка – Туран хоорайның үндезилекчизинге тураскаалды тургускан.