Июньнуң 6-да Тываның найысылалынга I чайгы республика Спартакиадазының түңнел чадазы эгелээр

Тывада I чайгы республика Спартакиадазының муниципалдыг ийиги чадазынга регионнуң шупту муниципалитеттери киришкен. Кожууннарның суурлар аразынга эрткен спортчу маргылдаларның түңнелдери-биле төнчү оюннарның киржикчилери шилиттинген. Республиканың Спорт яамызы, муниципалдыг чадага эрткен 500 хире маргылдааларга 12 муң ажыг кижи киришкенин, дыңнаткан.
Июнь 6-да эгелээн республика чергелиг спартакиаданың маргылдаалары ийи неделя иштинде үргүлчүлээр. Муниципалдыг тургузугларга шылгараан командалар маргылдааларга киржир. «Субедей» спорт школазының, «Херел» база «Автомобилист» спорт залдарынга, Иван Ярыгин аттыг спорт комплекизинге, «Хүреш» база Советтиг Тываның 5 чылы аттыг стадионнарга, олимпийжи белеткел төвүнге, Кызыл хоорайның 1 дугаар школазының спорт шөлүнге спортчу оюннарны эрттирер.
Волейбол, баскетбол, мини-футбол, стол теннизи, шой көдүрер спорт, чиик атлетика, ГТО, шахмат база шашкиге спортчулар чижир. Муниципалитет бүрүзүнден дөрт аңгы хар назынныг бөлүктерге эр болгаш херээжен спортчулар, оолдар база уруглардан тургустунган үш бза ондан хөй кижилиг чыынды команданы киирер.
Советтиг Тываның 5 чылы аттыг стадионга республика маргылдаазының байырлыг ажыдыышкыны болур. Майның 18-тен республиканың кожууннарынга байырлыы-биле эгелээн I чайгы Спартакиада эстафетазының маршруду аңаа доостур. Бөгүн Тес-Хем кожууннуң спортчулары спартакиаданың ыдык демдээ - тугун Таңдыже дамчыдар, оон каа-хемчилер, тожулар база бии-хемчилер ону уткуп алыр. Маршруттуң төнчү пунктузу - Кызыл кожуун, туда эстафета аңаа июьнуң 5-те кээр, а дараазында хүнде Тываның найысылалынга бодунуң узун оруун доозар.
Тываның Баштыңы Владислав Ховалыг регионнуң Дээди Хуралының (парламент) депутаттарынга чылдың Айыткалын таныштырып тура, муниципалитеттер аразынга I чайгы республика Спартакиадазын эрттирерин саналдап кииргенин сагындыраал. Тывада Чоннуң чаңгыс эп сеткилиниң чылынга тураскаадып спартакиада эртип турар. Аңгы-аңгы бөлүктерге тиилээн спортчуларга, командаларга акша шаңналдарын тыпсыр.
Команда аайы-биле бирги черни ээлээн киржикчи команда боттарының муниципалитединге ангарлыг спорт залы тудар сертификатты алыр. Ийиги черни ээлээн команда бодунуң кожуунунга кылымал сигенниг футбол шөлүн ойнап алыр болза, үшкү черни ээлээннерге быжыг спортчу шөлдүң сертификадын бээр.