Тываның Туризм агентилели “Сибирь дыштанылгалары” национал маршрутту сайзырадыр тулган төлевилелдерни деткиир

Тываның Туризм агентилелиниң республикада туризм инфраструктуразын хөгжүдеринге грантылар бээр конкурска киржир чагыглар хүлээп алыр немелде конкурс шилилгези июнь 12-ге чедир болурун дыңнаткан. 

«Туризм болгаш хүндүлээчел чорук индустриязы» национал төлевилел-биле конкурс эртип турар. “Сибирь дыштанылгалары” национал маршруттуң турисчи объектилерин тудуп хөгжүдер азы объектилерни чаагайжыдар эки төлевилелдерни саналдап кииргеннерге грант акша-хөреңгизин үндүрер.
Кадыкшылы кызыгаарлыг кижилерге таарыштырган эштир черлерни суг объектилериниң эриинге тудуп база сайзырадырынче, уруглар база спортчу дыштанылга зоналарын чаагайжыдарынче, хөй-ниити чемненилгезиниң капиталдыг эвес пунктуларын тударынче грантыны киирерин айыткан. Бо угланыышкында бир объектиниң боттанылгазынче 10 млн рубльди тускайлап үндүрер.
“Сибирь дыштанылгалары” национал маршруттуң объектилерин чаагайжыдары дээрге, кадыкшылы кызыгаарлыг кижилерниң хереглелдеринге таарыштырган турисчи капитал эвес объектилерни модернизастаары, ол ышкаш национал турисчи маршруттарның навигация системазының демдектерин белеткеп тургузары, турисчи капиталдыг эвес информастыг төптерни салып азы дериири, санитарлыг модульдарны садып тургузары болур. Айыттынган төлевилелдерниң ажылын эгелээринге 6,7 млн рубльди тускайлаан.
Конкурстуң база аңаа киржир дизе кандыг документилер дужаарының дугайында тодаргай тайылбырны туризм агентилелиниң бодундан айтырар: Кызыл хоорай, Кызыл партизаннар кудумчузу, 18В, «Туризм бажыңы», 2-ги каът, 4 кабинет. Тайылбыр алыр телефон: 8(394)22-3-44-33, электроннуг почта адрези: otdeltourizm@yandex.ru.
Агентилелдиң сайтызындан https://tourism-tyva.ru/ конкурстуң дүрүмүн көрүп болур.