Тыва Бүгү-российжи күш-ажыл ярмарказының федералдыг чадазынга белеткенип турар

Тываның Баштыңы Владислав Ховалыг «Работа России. Время возможностей» бүгү-российжи күш-ажыл ярмарказының федералдыг чадазын республикага белеткеп эрттирер организастыг комитеттиң составын бадылаан. Регион чазааның даргазының социал камгалал болгаш демография, ол ышкаш хамаатыларны ажылга хаара тударының айтырыгларын харыылап турар оралакчызы Орлан Сарыглар оргкомитетти удуртуп баштаар.
Июньнуң 23-те ярмарканың федералдыг чадазы болуп эртер. Ону канчаар организастаары амдызыында билдинмес. Ындыг болзажок, шупту регионнарның ажыл берикчилеринден эң-не кедилиг саналдар кирген "Работа России" порталда аңгы арынны ярмарканың ийиги чадазынга дээш албан-биле ажытканы билдингир. Регионнарга, ол ышкаш Тывага база, кадрлар онза чедишпес бүдүрүлгелерге офлайн-ярмарканы онлайн хевирге чергелештир эрттирер.
Апрельдиң 14-15 хүннеринде эрткен ярмарканың бирги – регион чадазынга Тывадан 133 ажыл берикчилери киришкенин сагындыраал. Республика найысылалында база бүгү кожууннарда 29 шөлчүгештерге ярмарканы организастаан. 1,5 муң ажыг хостуг олуттар сүмелээн ярмарканы 5 муң хире кижи кээп көрген. Ажыл дилеп келгеннер Алтай край, Ростов облазы дээш, өске-даа регионнардан ажыл берикчилери-биле онлайн таварыштыр харылзашкан. Ярмарканың бирги чадазында 47 кижи ажылга тургустунганын ТР-ниң Күш-ажыл яамызы дыңнаткан.
Владислав Ховалыг организастыг комитетке «Работа России. Время возможностей» бүгү-российжи күш-ажыл ярмарказының федералдыг чадазын республикага белеткеп эрттирериниң “орук картазын” ажылдап кылгаш, майның 31-ге чедир бадыладыр даалганы берген.