Тываның кожууннарында одаар чүүл складтарының тудуу база чаартылгазы уламчылавышаан

Эрткен чылын Тывада эгелээн одаар чүүл складтарының четкизин хөгжүдер ажылдар уламчылавышаан. Эрткен неделяда Сүт-Хөл кожууннуң Суг-Аксы суурда одаар чүүл складын тудуп эгелээн болза, Сарыг-Сеп биле Туранда складтарны эде чаартып турарын регионнуң Чуртталга-коммунал ажыл-агый яамызы дыңнаткан. Бо хүнде херимнерин эде-хере тудуп турар. Тудуг материалдарын эккээр, тудуп кылыр ажылдар, видеохайгаарал системазын эптээр, деңзилер эккеп база эптеп салыр дээш, ниитизи-биле 13 277 063,37 рубль акша түңүнге чээрби ажыг керээни чарган.
Республиканың Чазаа хөмүр-даш складтарының четкизин хөгжүдери – 2023 чылда Тываның Чуртталга-коммунал ажыл-агый яамызының мурнады боттандырар ажыл угланыышкыны кылдыр тодараткан. Печка одаар өрегелерни хөмүр-биле хандырарының төпчүткен системазын регионга тургузуптар болза, одаар чүүл өртээ үндезин чокка өспес апаар деп санап турар.
Тываның Баштыңы Владислав Ховалыгның даалгазы езугаар, Чуртталга-коммунал ажыл-агый яамызы регионнуң социал албан черлеринче база чурттакчы чонче хөмүр-даш сөөртүлгезин организастаар “орук картазын” ажылдап кылган. Сүт-Хөл кожуунга хөмүр складын тутпушаан, чүъктүг автомашиналарны деңзилээр чаа дериг-хереселди садып, эптеп салыры, ол ышкаш Сарыг-Сеп, Чаа-Хөл, Туран, Шагаан-Арыг, Чадаанада беш складтың деңзилээр дериг-херекселдерин чаартып, эде тудар ажылдар – хемчеглер санында кирген. Хөмүр шыгжап-садар шупту складтарны тускайжыттынган техника, чүдүрер-дүжүрер база чүък сөөртүп дажыыр автомашиналар-биле четчелээри көрдүнген.
Эрткен чылын республиканың муниципалдыг тургузуглары - Кызылга бир, Бай-Тайга, Барыын-Хемчик, Мөңгүн-Тайга, Тес-Хем, Таңды, Өвүр база Эрзин кожууннарга чеди, шупту сес хөмүр складтарын тудуп, чаартканын сагындыраал.