Тываның сүзүктүг эр чону ыдыктыг Бай-Тайганың дагылгазын бөгүн эрттирип турар

Республиканың чүдүкчү чону бөгүн Бай-Тайга кожуунда Тываның ыдык дагларының бирээзи - Бай-Тайга даан дагыыр езулалды эрттирип турар. Ыдыктыг Бай-Тайганы дагыыры бүгү республиканы ыдыктааны-биле дөмей күштүг деп бүзүрел бар. Ынчангаш сүзүктүг кижилерге Бай-Тайга даа - хей-аъттың киискидикчизи болуп чоруур. А дагылгага киришкен кижилерге бүдүн чыл чедиишкиннерни оштаар.
«Бөгүн Тывада кончуг күштүг дагылга эртип турар. Сака Дака “ачы-буян айында” ыдыктыг Бай-Тайганың дагылгазы хөй-ле улусту эвилелдээн – деп, Тываның Баштыңы Владислав Ховалыг социал четкилерде бодунуң блогунга бижээн. – Эр чонувус хар-чаъс дивейн, үш муң ажыг метр бедикче үнүп, дагылгага киришкеш, өршээлди дилеп, бүгү-ле чүүлдерге чедиишкиннерни кыйгыртыр».
Регионнуң удуртукчузу бөгүнгү шажынчы сүзүк-чүдүлгениң соонда, чаңгыс чер чурттугларының чырык күзелдери база планнары амыдыралга боттанырын күзээн. «Бистиң өгбелеривистиң чугаалап чорааны ышкаш, ыдыктыг тайгавысты дагаан чырыткылыг езулал кижи бүрүзүнге күчү күштү хайырлаар-ла болзунам» - деп, Ховалыг чугаалаан.
Бо эртен 7 шакта дагны дагыыр езулалга белеткел эгелээн. 9 шакта “Таңды саңын” салыр езулалды кылган. Тейлер деп черде Чоксум хүрээзиниң девискээринге шажын езулалдары уламчылаар. Бай-Тайга кожууннуң культура эргелелиниң ажылдакчылары байырлал концертин бараалгадыр. 14.45-15.30 шакта ном номчуур. Дагылгага келген эр хиндиктиг чонга концерт номерлерин көргүзүп турар үеде, аът чарыжының, ча адарының база тыва хүрештиң маргылдааларын организастаар.
Ыдыктыг Бай-Тайганың ады “бай тайга” дээн утканы илереткен. Тайга сынының ээзи херээжен бүгү Тываны камгалап турар деп, тоолчургу чугаа бар, ынчангаш ооң овур-хевирин кожууннуң ыдык демдектери – сүлдезинде база тугунда сиилбип чураан. Бай-Тайганың бедии – 3128 м, ооң эдээн - тундра база холумак тайга шыпкан. Майның төнчүзүнде – июнь эгезинде Тывада ыдыктыг тайганың дагылгазынга республиканың бүгү-ле булуңнарындан дыка хөй чүдүкчүлер чыглып кээри чаңчыл апарган.