Тываның Чазааның аппарат хуралында чурттакчы чоннуң айыыл чоруунуң айтырыынче кичээнгейни салган

Тываның Чазааның аппарат хуралында, ТР-ниң ИХЯ-ның эрткен неделяда “эзирик авариялар”-ның сан-чурагайының талазы-биле оперативтиг дыңнадыгны берген. Эрткен неделяда 31 орук озал-ондаа болган, 10 кижи кемдээн, 25 машина үрелген. Эзирик 22 чолаачы туттурган. ИХЯ дүвүренчиг сан-чурагайларга даянгаш, эзирик машина мунарынга удур профилактика хемчеглерин күштелдирери-биле, ындыг чолаачыларның ажылдап турар черлерин айытпышаан, хөйге дыңнадыр хемчегни киирерин саналдаан.
Владислав Ховалыг корум-чурум үрээшкиннериниң талазы-биле неделяның статистиказын сайгарып тура, Тываның кожууннарында ОШАЧКИ-ниң орук-доскуул албанының пунктулары катап ажылын эгелээнин сагындырып, Федералдыг үндүрүг албаны-биле Федералдыг суд приставтар албанының эргелели Иштики херектер яамызы-биле кады дежурныйлап, корум-чурум үрекчилерин калбаа-биле хынаарын саналдаан.
Неделя дургузунда Тывага ийи арга-арыг өрттү бүрүткеттинген, майның 19-ка чедир оларны өжүрген. 2023 чылдың эгезинден тура республика девискээринге 5625 га ниити шөлдүг 23 өрт (хову) болган. Владислав Ховалыг чурттакчылыг черлерге айыылды тургуза бербес кылдыр, суурларны долгандыр чер чардырар ажылды кыска хуусаада чорударын дааскан.
Тываның чумага удур станциязы Кызыл кожуунда сибирь язвазы тывылган деп турар черден алган биоматериалды шинчилеп турар. Росхереглекчилер хайгааралының Тывада эргелели Тываның ветеринария албаны-биле эпизоотиктиг черде малдарны тараан, инфекционист, терапевт база педиатр эмчилер кижилерни шинчээн, шупту кадык деп түңнээн. Регионнуң Кадык камгалал яамызы Тываның Баштыңының даалгазы-биле, аарыгның үнген черинде кижилерни онза эмчи хайгааралында алган.
Часкы суг көдүрлүүшкүнү-биле чергелештир суг хандырылгазында бергедешкен Хову-Аксы суурда суг чыыр черни эде чаартыр ажылдар уламчылавышаан. Тываның Баштыңының даалгазы-биле Чуртталга-коммунал ажыл-агый яамызы база кожуун чагыргазы Хову-Аксы суурнуң чурттакчыларынче арыг ижир сугну халас сөөртүп чедирип турар. ТР-ниң Тарифтер албаны Хову-Аксында савалаан суг өртээнге өртек өстүргенин хынаан, ТР-ниң Тудуг яамызы суг чыыр черни эде кылыр ажылды дүргедедир хемчегни ап турар.
Тывада 11 класстың 2366 доозукчуларынга “Сөөлгү коңга” эдер. Майның 26-да шылгалда эрттирер 28 пунктуга химияга, литературага база географияга бирги ЕГЭ болур. Шылгалдалар үезинде айыыл чок чоруктуң немелде хемчеглерин алыр, шылгалда тудар черге чедир өөреникчилерни школа транспорту-биле чедирер, шылгалда дужаар пунктуга чырык өшкен аварийлиг байдал тургустуна берзе, энергияның өске дөзүнче кожуптар арга бар.