Чоннуң чоон оруктарынга хыналда доскуул черлериниң ажылын катап тургузар

Тываның Баштыңы Владислав Ховалыг ажыл-агыйжы сургакчылаашкын үезинде, Тыва Республикада кем-херек үүлгедиишкиннерин эвээжедир ведомстволар аразының комплекстиг планының хемчеглери-биле катап туттунуп турар Чөөн-Хемчик биле Чаа-Хөл кожууннарда Тываның орук шимчээшкининиң айыыл чок чоруунуң талазы-биле күрүне инспекциязының орук-хайгыыл албанының стационарлыг ийи постузун хынаан.
«Бистиң сорулгавыс кезедири эвес, а чонувустуң орукка айыыл чок чоруун хандырары. Тывада орук-хайгыыл албанының стационарлыг постуларның ажылын албан езузу-биле катап эгелээнивис ол» - деп, Владислав Ховалыг объектиге чораан соонда, бодунуң блогунда бижээн.
Бо чылдың мартта Тываның Баштыңы Владислав Ховалыг республика прокуратуразының, Россияның Истелге комитединиң Тыва Республикада Истелге эргелелиниң, ТР-де Иштики херектер яамызының, Россияның кеземче күүселдезиниң федералдыг албанының ТР-де эргелелиниң удуртулгазы-биле Тыва Республикада кем-херек үүлгедиишкиннерин эвээжедир талазы-биле ведомстволар аразының комплекстиг планынга атты салганын сагындыраал. Ол планда орук шимчээшкининиң айыыл чок чоруунуң күрүне инспекциязының орук-хайгыыл албанының Тес-Хемде, Чаа-Хөлде база Чөөн-Хемчикте октаттынган стационарлыг постуларын катап ажылдадыры көрдүнген турган.
Амдыызында Чаа-Хөлде постудан аңгыда, Тес-Хем кожууннуң Самагалтай суурнуң чоогунда орук-хайгыыл албанының стационар постузун септеп-селээш, катап ажылдаткан. Чаа-Хөл кожууннуң Ак-Дуруг суур чоогунда постуда септелге ажылдары 95 хуу кылдынган, 2023 чылдың июньда ол ажылын эгелээр.
Владислав Ховалыг ажыл-агыйжы сургакчылаашкын үезинде Чадаананың постузунга чедип, катап чаартынган постулар эки түңнелдерни бээр боор деп демдеглээн. Постуларның ажылының шынарын күштелдирери-биле, орукта шимчээшкинни, ында болуушкуннарны тырттырар видеокамераларны аңаа салыр.