Тываның Баштыңы Шагаан-Арыгда гимназияның септелгезин хынаан

19.05.2023 Тываның Баштыңы Владислав Ховалыг Тываның Улуг-Хем кожуунга ажыл-агый аайы-биле чорааш, Шагаан-Арыг хоорайда гимназияда септелге ажылдары кайы хире кылдынып турарын хынаан. Регионнуң удуртукчузу “Өөредилге” национал төлевилели-биле школаларның капитал септелге программазының күүселдезин республикада боттандырып турарынче онза кичээнгейни углап, кылдынган ажылдарның шынарын боду хынап турар.
«Капиталдыг септелге – септелге ажыдарының чүгле чорудуу эвес, а ажы-төлүвүстүң амыдырал-чуртталгазының шынарын өскертиринге улуг идиглиг - деп ол чугаалааш, - чурттуң удуртулгазының мындыг эгелээшкиннериниң ачызында, ажы-төлдүң хоорайда азы көдээде чурттап турарындан хамаарылга чокка, таарымчалыг болгаш депшилгелиг байдалдарны хандырар ужурлуг бис. Аргажок эргижирээн школаларда өөренип турар ажы-төлге өөредилгениң амгы арга-хевирлерин чугаалары болдунмас».
«Өөредилге хөгжүлдези» программаның «Өөредилгениң школа системазын модернизастаары» хемчег-биле капитал септелгезин кылыр 13 ниити өөредилге школаларының бирээзи Шагаан-Арыгның гимназиязы дээрзин сагындыраал.
«Планета» КХН тудуг организациязы-биле 29800 муң рубльга күрүне керээзи чардынган, объектиде амгы үеде 22 кижи ажылдап турар. Шеверлел-маляр ажылдары чоруп турар, шалазын дескилээн, ооргаларын куткан. Дөрт ажылчын девиирин сөп турар.
39 тонна элезинни, 9 кубометр тудуг ыяжын, 1,5 тонна гипсокартон, цемент, шпатлёвканы дүжүрүп, вентиляция эптээр материалдарны сөөртүп эккелгенин тудугжулар дыңнаткан. Ам эжиктер болгаш демир хоорзаларлыг шой батереяларның келирин манап турар. Соңгалар салыры доозулган, чырык четкизин бүрүнү-биле септеттинер. Ханаларны дескилээр, шаланы шывар, чырык удазыннарын база одалга системазын солуур улуг ажылдар ам-даа мурнунда. Тудугнуң кырын база бүрүнү-биле солуур.
Оолдар, уруглар чаа өөредилге чылын чаартынган оран-савада, бүгү-ле таарымчалыг байдалдарга эгелээр. Гимназияны чаагайжыдып, амгы үениң эт-севи база оргтехниказы-биле дериир.
1980 чылда туттунган Шагаан-Арыг хоорайда гимназияны Альбина Дамбаа 2012 чылдан бээр удуртуп турар. Гимназияда 369 оолдар, уруглар өөренип турар. Директорнуң чугаазы-биле алырга, септелге ажылдары өөредилге чорудуунга шаптыктавас, уругларны үш аңгы өөредилге организацияларында хувааган, кичээлдер үзүктел чок эртип турар. Чеди класс, азы 150 өөреникчи Шагаан-Арыгның 1 дугаар шкоалзында немелде өөредилге төвүнде өөренип турар болза, эге класстарның 164 өөреникчизин хоорайның 2 дугаар школазынче шилчидип, ийи сменада өөредилгезин организастап, изиг чемненилге-биле хандырган. Гимназиядан школа столоваязынче мебельди база кухня эт-севин чедирген. Улуг класстарның 55 өөреникчизи Шагаан-Арыгның 2 дугаар школазының өөредилге-консультация пунктузунуң оран-савазында өөренип турар. Ында өөредилге консультацияларынче хаара туттунган.
Уругларны өөренир черинге чедир школа автобузу график езугаар сөөртүп турар деп, гимназияның директору Альбина Дамбаа чугаалаан.