Тываның Баштыңы ат-алдарлыг башкы Елизавета Боракаевна Салзынмааның мөчээни-биле кажыыдалын илереткен.

Тыва АССР-ниң алдарлыг башкызы, Улус чырыдыышкынының тергиини Елизавета Боракаевна Салзыңмаа 93 харлап бар чорааш мөчээн. «Ол эртемниң хөгжүлдезинге эгээртинмес үлүг-хуузун киирип, дыл эртеми-биле холбашкан хөй-хөй үндезин ажылдарның автору болган. Ооң күш-ажылчы оруу күрүнениң аңгы-аңгы хүндүлүг шаңналдары-биле демдеглеттинген. Елизавета Боракаевнаның эң хүндүткелдиг, чоргаарланыр улусчу ады – башкыларның Башкызы” деп, бодунуң блогунга Владислав Ховалыг мындыг бижикти арттырып, амы-хуузундан база Тыва Чазактың мурнундан дыл шинчилекчизиниң дөргүл-төрелинге, чоок кижилеринге кажыыдалын илереткен.

Елизавета Боракаевна 1930 чылдың октябрь 12-де Таңды кожууннуң Межегей суурга төрүттүнген. Кызылдың №2 школазын дооскаш, Ленинградта күрүне университединиң чөөн чүк факультединче дужаап кирип алган. Ленинградка өөренип тургаш-ла, ол өөнүң ээзи, сөөлүнде барып сураглыг тыва болгаш совет төөгүчү апаар Юрий Лудужапович Аранчын-биле бодунуң салым-чолун доңнаан. 1954 чылда Елизавета Салзыңмаа Кызылдың башкы училищезинге күш-ажылчы намдарын эгелээн. Ооң соонда Башкы институдунда ажылче шилчиир.

Институттуң үндезилеттинип тургустунганының баштайгы хүннеринден тура, ооң соонда Тываның күрүне университединиң тыва дыл болгаш чогаал кафедразынга ажылдап келген. Тыва дылдың үн тургузуунуң (фонетиказының), синтаксизиниң, орус болгаш тыва дылдарның деңнелге грамматиказының талазы-биле курстарны номчуп, студентилерниң курс болгаш мергежил ажылдарының удуртукчузу болуп келген.

Ол 21 эртем ажылының автору — 13-ү эртем, а 8-и эртем-методиктиг ажылдар. Оларның аразында профессор Ш.Ч.Сат-биле кады бижээни «Амгы тыва дыл. Фонетика, лексика, морфология» (1980), филология салбырының “Орус дыл болгаш чогаал” мергежилинде өөренип турар студентилерге бижээни «Тыва дылдың өөредилге ному» (1980), “Орус болгаш тыва дылдарның деңнелге грамматиказы. Фонетика, морфология» (2000) деп өөредилге ному.

Эртемниң хөгжүлдезинге киирген үлүг-хуузу, хөй чылдарда ак сеткилдиг ажылы болгаш бедик профессионализми дээш Елизавета Боракаевна бедик шаңналдар-биле: РСФСР-ниң болгаш Тыва АССР-ниң Чырыдыышкын яамыларының хүндүлүг бижиктери-биле шаңнаткан. Ол “Күш-ажылчы шылгарал дээш” деп медальдың эдилекчизи. Аңаа ”Тыва АССР-ниң школаларының алдарлыг ажылдакчызы”, “Улус чырыдыышкынының тергиини” хүндүлүг аттарны тывыскан.