Тываның экономиказының бир шимчедикчизи туризм адырында деп "РФ.Туризм корпорациязы" көрүп турар

«РФ.Туризм корпорациязы» акционерлиг ниитилелдиң чиңгине директору Сергей Суханов болгаш Тыва Республиканың Чазааның Даргазының бирги оралакчызы Владимир Донских «РФ.Туризм корпорациязы» АН-ниң регион-биле турисчи курлавыр хөгжүлдезинде кады ажылдажылгазының дугайында чугаалашкан. Туризм.РФ портал ужуражылганың дугайында дамчыткан.
Республика чылдың дөрт эргилдезинде, Россиядан болгаш даштыкыдан келген туристерниң кичээнгейин бойдустуң чайгаар бүткен чараш черлеринче маршруттар, эмнээр, кадыкшыл быжыглаар экологтуг туризм-биле хаара тудуп турар. Регионче аян-чорукчуларның турум агымы туризм инфраструктуразының хөгжүлдезин тургузар.
«Тыва Республиканың девискээринге «РФ. Туризм корпорациязы» АН-биле кады туризмни хөгжүдериниң чылдагааннары хөй. Малгаш болгаш аржаан суглар-биле эмненир курорттар ажыдар төлевилелдер-биле кады ажылдажылганы эгелеп болур. Тывага туризм республиканың экономиктиг хөгжүлдезинге улуг идигни берип, бизнеске чаа аргаларны тургузуп, социал-экономиктиг эки түңнелдерни бээри чугаажок» – деп, Сергей Суханов ужуражылга үезинде демдеглээн.
«Кадыкшыл быжыглаар, эмнээр, аңнаар-балыктаар, этнографтыг дээш, туризмниң аңгы-аңгы хевирлерин саналдап болур бис. Азияның географтыг төвү Тывада дээрзи бадыткаттынган. Россияның Президентизи Владимир Владимирович Путин Тываның кайгамчык чараш черлерин эргээн дээрзин бүдүн делегей билир. Аалчыларга таарымчалыг байдалдарны тургузуп, бедик деңнелдиг ачы-дуза чедирилгезин хандырарын чедип алыры – бистиң кол хүлээлгевис. Ынчангаш «РФ. Туризм корпорациязы» АН-ниң деткимчези биске чугула херек» – деп, Владимир Донских чугаалаан.
«РФ. Туризм корпорациязы» АН биле Тыва Республиканың кады ажылдажылгазы ооң мурнунда туризмни кады хөгжүдер дугайында чардынган керээзин езугаар боттанып турар.