Тывада муниципалдыг келдириишкин комиссияларының ажылынга демдекти салыр

Тываның Баштыңы Владислав Ховалыг ооң айтыышкыны-биле мунициалдыг келдириишкин комиссияларның даргалары кылдыр томуйлаткан кожуун чагырга даргаларының шүшпең ажылын айтып, келдириишкин комиссияларның ажылын хынап, ооң ажылының шынарынга анализти бээр даалганы берген.
Республиканың шериг комиссариады часкы кыйгыртылганы организастаарынга келдириишкин комиссияларның даргалары идепкей чок болуп турарын дыңнаткан. Муниципалдыг удуртукчуларның шүшпеңинден комиссия хуралдарының саны күүсеттинмейн, келдириишкинче кыйгырткан хамаатылар саны эвээженин ведомство медеглээн.
Владислав Ховалыг чазак аппарадының удуртукчузу Юрий Ананьинге мунициалдыг келдириишкин комиссияларының ажылын хынаарын организастап, ол угланыышкында ажылга контрольду күштелдирерин сүмелээн.
Тыва Республиканың Баштыңының 2023 чылдың март 29-та 169-РГ дугаарлыг айтыышкыны-биле, шериг албанынче хамаатыларны шилиир келдириишкин комиссиязының ажылдаарының чурумун болгаш составын бадылаан.
Владислав Ховалыгның бодалы-биле алырга, келдириишкин комиссияларның кежигүннери база тус чер чагыргалары кыйгыртып турар аныяк кижилерге шериг албанының база керээ-биле албанның ылгалын тайылбырлаар ужурлуг. Дыка хөй оолдарның ада-иелери ол билиишкиннерге будалып, оолдарын шериг эрттиреринден ойталадып турар.
Шериг хүлээлгезинче келдирткен кижиниң шериг албаны 12 ай уламчылаар. Кыйгыртылга-биле чоруткан оолдарны тускай шериг операциязының зоназынче киирбес, олар кыйгырткан регионунуң чоогунга албан хүлээлгезин эрттирер.
Апрельдиң 20-де, Тывадан кыйгырткан оолдарның Россияның Чепсектиг күштеринче бирги байырлыг үдээшкини болган. Часкы кыйгыртылга үезинде республикадан 700 оолду шеригже үдээр.