“Кижилерге болгаш кижилер дээш” деп волонтерларның I республика шуулганынга киржиринче тыва аныяктарны чалап тур

2023 чылдың майның 24 - 26 хүннеринде, Тываның Бии-Хем кожуунунда «Туран» сыын ажыл-агый чериниң девискээринге, “Кижилерге болгаш кижилер дээш” деп волонтерларның I республика шуулганы болуп эртерин, республиканың Аныяктар херектериниң талазы-биле агентилели дыңнаткан.
Шуулганга киржир күзелдиг 18-35 хар-назылыг аныяктардан чагыгларны май 22-ге чедир “Россияның аныяктары” автоматчыткан информация система таварыштыр хүлээп турар.
Тывада эки турачы чорукту сайзырадырынга тураскааткан комплекстиг хемчеглер, мастер-класстар, тренингилер, лекциялар шуулганның программазында кирген. Оон аңгыда «Аныяктарның социал төлевилели-2023» грант мөөрейинче киирген төлевилелдерниң камгалалы база болур. Тиилекчилер боттарының инициативаларын боттандырарынга күрүне деткимчези кылдыр 300 муң рубльди алыр.
Республиканың Аныяктар херектериниң талазы-биле агентилел бодунуң аудиториязынга белеткээн элээн каш улуг хемчеглеринге “Кижилерге болгаш кижилер дээш” деп шуулганы-биле стартты бээр. Чүгле чай дургузунда безин аныяктар политиказының специалистеринге бештен эвээш эвес республика болгаш зона шуулганнарын база слёттарны планнаан.
Эрткен чылдың декабрьда чуртта аныяктар политиказының боттандырылгазын сайгарып чугаалашкан РФ-тиң Күрүне Чөвүлелиниң хуралының соонда, Тываның Баштыңы Владислав Ховалыг аныяктарның бүгү талалыг сайзыраарының аргаларын хандырар, ол ышкаш аныяктарның эки турачы миссиязын деткип база хөгжүдер талазы-биле ажылды күштелдирери чугула деп чугааланын сагындыраал.
“Кижилерге болгаш кижилер дээш” деп шуулганның дугайында немелде информацияны, ол ышкаш Тывада аныяктар хемчеглериниң дугайында чаа медээлерни болгаш анонстарны организаторларның албан ёзунуң ниитилежилгезиниң Контактыда https://vk.com/molodej_tuva социал четкиден көрүп болур.