Тываның шериглеринге күрүне шаңналдарын тывыскан

08.05.2023 Май 8-те Виктор Көк-оол аттыг Национал хөгжүм-шии театрынга Ада-чурттуң Улуг дайынының Тиилелгезиниң 78 чылынга тураскааткан байырлыг концерт болуп эрткен. Аңаа Тываның шериглеринге күрүне шаңналдарын тывыскан.

Чыылган чонну ынчангы дайын чылдарының ыры-хөгжүмү-биле симфониктиг оркестр уткуп алган. Байыр­лыг хемчегни ТР-ниң Чазааның Даргазының бирги оралакчызы Владимир Донских ажыдып, Тиилелге хүнүн таварыштыр байырын чедирген.

Улаштыр Россия Федерациязының болгаш Тыва Республиканың күрүне шаңналдарын байырлыг байдалга тывыскан.

РФ-тиң Президентизиниң чарлыы-биле шериг хүлээлгезин күүседип тургаш, эрес-дидим чоруун көргүскени дээш “Эрес-дидим чорук дээш” деп орден-биле биче лейтенант Николай Монгушту, ефрейтор Чойган Кара-Салды, “Эрес-дидим чорук дээш” деп медаль-биле биче сержант Николай Сундуй-оолду, анаа дайынчы Ай-Херел Ондарны шаңнаан.
Анаа дайынчылар Артур Шивит-оолга, Демир Донгакка, Меңги Монгушка, улуг сержант Сылдыс Сатка, ефрейторлар­ Эчис Монгушка, Белек Монгушка, Валерий Ондарга шериг хүлээлгезин күүседип тургаш, эрес-дидим чоруун көргүскени дээш “Эрес-дидим чорук дээш” деп медальдарны ийи дакпыр тыпсып турар.

“Суворовтуң” медалын анаа дайынчы Амыр-Санаа Кара-Сал алган. Ак сеткилдиг ажылы дээш Тыва Республиканың Баштыңының Өөрүп четтириишкин бижиин 71183 шериг кезээниң ме­дицина взводунуң медицина салбырының командириниң оралакчызы Антон Курууга тывыскан.

Тыва Республиканың Баштыңының чарлыы-биле шериг хүлээлгезин күүседип тургаш, эрес-дидим, маадырлыг чоруун көргүскени дээш Буян-Бадыргы ордениниң III чергези-биле Орлан Кыргысты, прапорщик Салим Чадамбаны, медицина взводунуң фельдшери Айдыс Кууларны, улуг сержант Дадар-оол Кууларны, Начын Осумбаны шаңнаан.
Шаңналдар тыпсыр ёзулалдың соонда Кызылдың президентиниң кадет училищезиниң шериг ор­кестри, тыва эстраданың артис­тери дайын үезиниң ырыларын күүсеткеннер.