Красноярскиниң филармониязы тыва композиторлар Ростислав Кенденбильдиң база Хүреш-оол Дамбаның чогаадыкчы ажылдарының төлевилелин эгелээн

Красноярск филармониязы Президентиниң культурлуг инициативалар фондузунуң деткимчези-биле, Ростислав Кенденбильдиң 100 база Хүреш-оол Дамбаның 80 харлаанынга тураскааткан “Эне-Сайның симфониязы” хөгжүм өнчүзү” төлевилелди боттандырып эгелээн. Төлевилел боттанылгазы-биле тыва композиторларның симфониктиг оркестрге хөгжүм чогаалдарын катап тургузуп, партитураларын болгаш каталогтарын чурагайжыдып, чырыкче үндүрер. Яндекс.Музыка, Звук, ВК дээн ышкаш, өске-даа чурагайлыг шөлчүгештерге чогаалдарны бижидип, салыр.
Дирижёр Михаил Мосенковтуң башкарганы Красноярскиниң академиктиг симфониктиг оркестри катап тургускан чогаалдарны күүседир. Красноярск, Кызыл база Саяногорск хоорайга концерттер болуп эртер.
«Эң-не делгем аудиторияга тыва симфониктиг хөгжүмнү таныштырарын кызыдар бис. “Эне-Сайның симфониязы” хөгжүм өнчүзү” төлевилел боттандырылгазы-биле Енисей Сибириниң композиторларының чогаадыкчы ажылдарын катап тургузар дээн ажылывысты уламчылаар бис. Төлевилелдиң ачызында онзагай регионнуң академиктиг хөгжүм өнчүзүнүң бүрүн антологиязын чыып тургузар дээн ийиги базымывыс болур» — деп, Красноярск филармониязының чиңгине директору Евгений Стодушный чугаалаан.
Эрткен чылын Красноярск крайның филармониязы Президентиниң культурлуг инициативалар фондузунуң база Тыва Республиканың Культура яамызының деткимчези-биле “Владимир Токаның Эне-Сайның акварели” хөгжүм өнчүзү” төлевилел боттандырылгазы-биле тыва композиторнуң чогаалдарын бижиткенин сагындыраал. «Мелодия» үн бижидер компания тыва композиторнуң чогаалдарындан “Енисей акварели” альбомну үндүрген. «Мелодия» компанияның сайтызындан, Яндекс.Музыка, Звук, ВК база YouTube хөгжүм шөлдеринде дамчыдылга агымнарындан бижидилгени онлайн дыңнап болур.