Тывада «Сорунза» губернатор төлевилели-биле ийи көдээ клубту тудар

Республиканың бичии суурларынга культура дыштанылга төптери тудар «Сорунза» губернатор төлевилели бо чылын база ажылын уламчылаар. Сүт-Хөл кожууннуң Кара-Чыраа база Өвүрнүң Ак-Чыраа суурларга көдээ культура одаглары туттунарын төлевилелдиң удуртукчузу Культура яамызы дыңнаткан.
Төлевилел негелдези-биле 120 олуттуг көрүкчүлер залдыг, 243 дөрбелчин метр ниити шөлдүг культура бажыңын республика бюджединиң акша-хөреңгизи-биле саткан тудуг материалдарын ажыглап, тус черниң суму чагыргазы суурундан тускай мергежилдиглерни хаара тудуп үндүрер.
Культура яамызы тудугнуң чорудуун контрольга тудар. Сөөлгү медээден алырга, Кара-Чыраа суурда тудугнуң таваан 10 кижи кудуп, ханаларын тудуп эгелээн. Клуб турар черни долгандыр херимнээн. Объектини чырык хандырылгазында база кудукта кошкан.
А Ак-Чыраа суурда объект чырыкта коштунган, суурнуң 8 чурттакчызы таваан кудар ажылдарны эгелээн. А кудукту өрүмнээрге белеткел чоруп турар. Культура бажыңарын тударынга херек материалдарны саткан, чер участоктарын кылдырткан, тудугже 29 млн рубльди аңгылаанын, культура яамызы дыңнаткан. Бо чылдың күске чедир шупту ажылдар доостур ужурлуг.
Суурунуң чонун сорунзалаар Ак-Чыраа биле Кара-Чыраада культурлуг дыштанылга төптери ажыттаны бээр болза, губернатор төлевилели-биле туткан 11 суурлар даңзызынче кирер.